Elordada Jumabek Táshenovke eskertkish ornatylady
Eskertkish Jumabek Táshenov kóshesiniń boıynda ornatylatyny josparlanǵan.
«Bul - Petropavl qalasynda turatyn Soltústik Qazaqstan oblysynyń qurmetti azamattary Jaqsylyq Ysqaqov, Bolat Saǵyndyqov, Zeınolla Oljabaev, Tańat Súgirbaev, Amangeldi Kenjeǵozınov, Ahmetjan Qýantaev, Jangeldi Tájın jáne Saǵyndyq Salmurzın syndy belsendi aǵalarymyzdyń bastamasy. Sol kisiler Prezıdent saılaýy qarsańynda «Nur Otan» partııasynan usynylǵan kandıdat Qasym-Jomart Toqaevtyń oblystyq qoǵamdyq qabyldaý bólmesi arqyly Parlament Májilisiniń depýtaty retinde maǵan hat joldap, astanamyz Nur-Sultan qalasynda kórnekti memleket jáne qoǵam qaıratkeri Jumabek Táshenovke eskertkish ornatýǵa kómektesýimdi suraǵan edi», - deıdi Káribaı Musyrman.
Onyń aıtýynsha, osy jóninde Nur-Sultan qalasynyń burynǵy ákimi Baqyt Sultanovqa hat joldanǵan.
«Halqymyz aıryqsha ardaq tutatyn tarıhı tulǵanyń dúnıege kelgenine kelesi jyly 105 jyl tolatynyn eskere otyryp, oǵan astanada laıyqty eskertkish ornatý máselesin qaraýyn ótingen bolatynmyn. Búgin Nur-Sultan ákiminiń orynbasary Erlan Kanalımov qol qoıǵan resmı jaýapty alyp, qýanyp otyrmyn. Qala ákimdigi Jumabek Táshenovke eskertkish ornatý úshin jer telimi jáne qarjy kózi qarastyrylyp jatqandyǵyn habarlady. Eskertkish elordadaǵy Jumabek Táshenov kóshesiniń boıynda ornatylmaq. Al Petropavl qalasynda qazaq jeriniń tutastyǵyn saqtap qalý úshin basyn báıgege tikken qaharman erge eskertkish osydan birneshe jyl buryn ornatylǵan bolatyn», - dedi májilismen.
Káribaı Musyrmannyń aıtýyna qaraǵanda, eskertkish ornatý máselesi qala deńgeıinde sheshilip tur.
«Bul sharýanyń saıası mańyzy joǵary. Elordada Jumabek Táshenovke laıyqty eskertkish ornatý kerek. Ol Baýyrjan Momyshuly sııaqty jastarǵa rýh beretin úlken tulǵalardyń biri», - deıdi Káribaı Musyrman.
