Elordada júgirýden onlaın jarys ótedi
NUR-SULTAN. QazAqparat - 7-13 jeltoqsan aralyǵynda Nur-Sultanda «Saryarqa Jugiru» onlaın-jarysy ótedi, dep habarlaıdy QazAqparat.
Sporttyq is-sharaǵa tirkeý búgin, 4 jeltoqsanda bastaldy. Jarysqa www.jgr.kz veb-saıtynda jeltoqsannyń 4-i men 13-i aralyǵynda onlaın tirkelýge bolady. Jas ereksheligine baılanysty shekteýler joq.
Elorda ákimdiginiń qoldaýymen ótetin sporttyq shara uıymdastyrýshylary – QR Jeńil atletıka federatsııasy, Nur-Sultan jeńil atletıka federatsııasy.
Onlaın-jarys bastamasy buqaralyq sportty damytýǵa jáne pandemııa kezinde azamattardyń salaýatty ómir saltyn saqtaýǵa baǵyttalǵan. Jáne oǵan densaýlyǵy boıynsha qarsy kórsetilimderi joq azamattar ǵana jiberiledi.
«Saryarqa Jugiru» qashyqtyǵy – 5 shaqyrym. Іs-sharaǵa qatysýshylar ony 7-13 jeltoqsan aralyǵynda óte alady. 5 km marshrýtty apta ishinde birneshe ret kez kelgen yńǵaıly ýaqytta júgirip ótýge bolady.
Jeńimpazdy anyqtaý úshin sportshynyń eń jaqsy upaıy eskeriledi. Eń bastysy – tirkelý jáne qatysýdyń barlyq sharttaryn oryndaý.
Ol úshin Strava mobıldi qosymshasynda júgirgennen keıingi kórsetkishti tirkeý kerek. Ári qaraı, nátıjeler tekserý protsedýrasynan soń www.jgr.kz saıtynda jarııalanady.
Sonymen qatar qatysýdyń mańyzdy sharttarynyń biri - Instagram paraqshańyzda jarys týraly habarlama jarııalaý jáne #saryarkamarathonchallenge is-shara heshtegin, Nur-Sultan jeńil atletıka federatsııasynyń @nsathleticskz, «Jugiru» platformasynyń @jgr.kz jáne Saryarqa aýdany ákimdiginiń @saryarka.akimat profılderin belgileý.
Kóktal-1 turǵyn alabynyń jańa saıabaǵynda qashyqtyqqa júgirgen qatysýshylarǵa arnalǵan syılyqtar:
1 oryn - iPhone 12
2 oryn - 300 AQSh dollary
3 oryn - 200 AQSh dollary
Qalanyń basqa bólikterinde júgirgen jáne Qazaqstan Respýblıkasynyń basqa qalalary men oblystarynda, sondaı-aq respýblıkadan tys jerlerde turatyn qatysýshylarǵa arnalǵan syılyqtar:
1 oryn - 150 AQSh dollary
2 oryn - 100 AQSh dollary
3 oryn - 75 AQSh dollary
Barlyq jeńimpazdar men júldegerler mereıtoılyq medaldarmen jáne sertıfıkattarmen marapattalady. Egjeı-tegjeıli aqparatty jgr.kz resmı saıtynan alýǵa bolady.
