Elordada JRVI jáne metapnevmovırýs boıynsha epıdemıologııalyq jaǵdaı qalaı
ASTANA. KAZINFORM — Astana qalasy Sanıtarııalyq-epıdemıologııalyq baqylaý departamenti basshysynyń orynbasary Janna Pralıeva elordadaǵy JRVI jáne metapnevmovırýs boıynsha epıdemıologııalyq jaǵdaıǵa qatysty túsinik berdi.
- 2024 jyldyń 26 jeltoqsannan bastap 2025 jyly 1 qańtarǵa deıin elordada jiti respıratorlyq vırýsty ınfektsııalardyń 4863 jaǵdaıy tirkeldi, ıaǵnı 100 myń turǵynǵa shaqqandaǵy syrqattaný kórsetkishi 333.5 deńgeıinde boldy. Byltyrǵy sáıkes kezeńmen salystyrǵanda aýrý juqtyrý 10 paıyzǵa joǵary, - dedi J. Pralıeva.
Tumaýǵa jatpaıtyn vırýstardyń ishinde rınovırýs 13 paıyz kórsetkishpen basym deńgeıde boldy, al birshama az kórsetkishte rınosıntıtsıaldy vırýs (8%), bokavırýs (2%), adam koronavırýsy (3%), adenovırýs (2%), paragrıpp (1%), metapnevmovırýs (1%) anyqtaldy. Sonymen qatar, bir naýqasta eki nemese úsh vırýsy barlar da az emes.
- Metapnevmovırýs - kóptegen elde, sonyń ishinde Qazaqstanda da taralatyn vırýstardyń biri. Infektsııalardyń basqa túrlerimen qatar, ıaǵnı JRVI jáne tumaý aýrýynyń maýsymdyq ósýi kezinde aınalymda bolady, - dedi departament ókili.
Osy oraıda Astana qalasynyń Sanıtarııalyq-epıdemıologııalyq baqylaý departamenti halyqty aldyn alý sharalaryn saqtaýǵa jáne adamdar kóp jınalatyn jerlerge barýdan tartynýǵa shaqyrdy. Ásirese, bul jaǵdaı sozylmaly aýrýlary bar halyqtyń neǵurlym osal toptaryna qatysty. Sondyqtan úı-jaılardy únemi jeldetip otyrý, naýqas adamdarmen baılanysty shekteý, olardy oqshaýlaýdy qamtamasyz etý, tumaý jáne JRVI belgileri paıda bolǵan kezde balalardy úıde qaldyrý kerek. Eger aýrýdyń belgileri paıda bolsa, ýaqtyly medıtsınalyq kómekke júgingen jón.
Osyǵan deıin habarlaǵanymzdaı, Memleket basshysy L.N. Gýmılev atyndaǵy Eýrazııa ulttyq ýnıversıtetiniń Stýdentter úıine barǵanda metapnevmovırýspen baılanysty jaǵdaıǵa pikir bildirgen edi.