Elordada JOO stýdentteri shahmattan ózara myqtyny anyqtaıdy
NUR-SULTAN. QazAqparat - Elordada 2-4 sáýir aralyǵynda shahmattan Dınara Sádýaqasovanyń kýbogi úshin stýdentter arasynda respýblıkalyq týrnır ótedi, dep habarlaıdy QazAqparat tilshisi.
Týrnır Nur-Sultandaǵy L.N.Gýmılev atyndaǵy Eýrazııa Ulttyq ýnıversıtetinde ótkizilmek.
«2013 jyldan beri Dınara Sádýaqasovanyń kýbogi úshin respýblıkalyq, keı kezde halyqaralyq týrnır ótkizilip júr. Saıystyń maqsaty - jastardy shahmat ónerine baýlý, sonymen birge aqyl-oıdyń oıyny sanalatyn shahmatty halqymyzdyń arasynda nasıhattaý. Bıyl bul chempıonatqa otyzdan asa joǵarǵy oqý oryndarynyń shahmat sheberleri qatysqaly otyr. Qatysýshylardyń sany 102-dan asady. Bul biz úshin óte mańyzdy. Bul bir jaǵynan Dınara Sádýaqasovanyń eńbegin kórsetedi. Sondaı-aq, dástúr sabaqtastyǵyn aıqyndaıdy. 2013 jyldan beri qarasańyz, qatysýshylardyń sany da, sapasy da artyp keledi», - deıdi L.N.Gýmılev atyndaǵy Eýrazııa Ulttyq ýnıversıtetiniń prorektory Dıhan Qamzabekuly.
Júldeniń jalpy qory - 1,5 mln teńge. Týrnır Jastar jyly aıasynda uıymdastyrylady.
Týrnır FIDE reıtıngin esepke ala otyryp, jeke jáne komandalyq esep boıynsha ótkiziledi. Erler arasynda 1-10 orynǵa deıin, al qyzdar arasynda 1-7 orynǵa deıin júlde alǵandar aqshalaı syılyqqa ıe bolady. Jeńimpaz komandaǵa álemniń birneshe dúrkin chempıony, halyqaralyq grossmeıster Dınara Sádýaqasovanyń kýbogi tabystalady.
Jarysty uıymdastyrý mindeti «Samuryq-Qazyna» Ulttyq ál-aýqat qory» AQ qoldaýymen Dınara Sádýaqasovanyń shahmat akademııasyna júktelgen.
