Elordada jóndeý jumystaryna baılanysty eki kóshe 25 tamyzǵa deıin jabylady
NUR-SULTAN. QazAqparat - Jóndeý jumystaryna baılanysty Bıgeldınov pen Jubanov kósheleri 25 tamyzǵa deıin jabylady. Osyǵan baılanysty elorda turǵyndary men qonaqtaryna marshrýtty aldyn-ala josparlaý usynylady, dep habarlaıdy QazAqparat tilshisi.
Ákimdiktiń aqparatyna sáıkes, 23-25 tamyz aralyǵynda jol-qurylys jumystaryna baılanysty Nur-Sultanda birqatar kósheler jabylady.
Ortasha jóndeý aıasynda Bıgeldınov kóshesinde Saryarqa dańǵylynan Jeńis dańǵylyna deıingi ýchaskede jumystar júrgizilýde. Osyǵan oraı, 23-25 tamyz aralyǵynda kólik qozǵalysyn tolyǵymen jabý josparlanǵan.
Sondaı-aq Jubanov kóshesinde Abaı dańǵylynan kósheniń sońyna deıin jol qurylysy júrip jatyr. Dál osy merzimde qozǵalys toqtaıdy.
«Elorda turǵyndary men qonaqtary qala joldarynda keptelis týdyrmaý úshin baratyn baǵytyn aldyn-ala josparlaý kerek. Keltirilgen qolaısyzdyqtar úshin keshirim ótinemiz jáne jóndeý jumystaryna túsinistikpen qaraýdy suraımyz», – dedi elordanyń kólik jáne jol-kólik ınfraqurylymyn damytý basqarmasynyń ókilderi.
