Elordada joldan ótip bara jatqan áıeldi avtobýs qaǵyp ketti
NUR-SULTAN. QazAqparat – Nur-Sultan qalasynda joldy kesip ótken áıeldi qoǵamdyq kólik qaǵyp ketti, dep habarlaıdy QazAqparat tilshisi CTS jaýapkershiligi shekteýli seriktestiginiń baspasóz qyzmetine silteme jasap.
«№40 avtobýs júrgizýshisi joldy jaıaý júrginshige arnalǵan belgi joq jerden kesip ótken áıeldi qaǵyp ketti. Júrgizýshiniń aıtýynsha, ol aıaldamadan endi ǵana qozǵalǵan. Jol taıǵanaq bolǵandyqtan áıel tepe-teńdikti saqtaı almaı qulaǵan. Degenmen avtobýs júrgizýshisi der kezinde toqtap, jedel járdem shaqyrǵan», - dedi atalǵan mekemeniń qoǵammen baılanys bóliminiń jetekshisi Naýat Azanbaeva.
Onyń aıtýynsha, oqıǵa ornyna polıtsııa qyzmeti shaqyrylyp, qoǵamdyq kólik júrgizýshisinen túsinik alyndy.
Odan ári istiń anyq-qanyǵyna jetý úshin materıal tekserýge jiberildi.
Atalǵan jol-kólik oqıǵasyna qatysty polıtsııa departamenti de túsinik berdi.
«3 aqpan kúni saǵat 11:40-ta Táýelsizdik dańǵyly boıyndaǵy aıaldamadan júre bastaǵan avtobýs júrgizýshisi joldy belgi joq jerden kesip ótken áıeldi qaǵyp ketti. Dene jaraqatyn alǵan zardap shegýshi aýrýhanaǵa jetkizilip, dárigerlerdiń qaraýynan soń úıine jiberildi. Oqys oqıǵaǵa qatysty anyqtaý sharasy júrip jatyr», - delingen aqparatta.
Osy oraıda qalalyq polıtsııa departamenti jaıaý júrginshilerdi jol erejesin buzbaýǵa jáne saq bolýǵa shaqyrady.
