Elordada jolaı ótip bara jatqan jigit Esil ózenine sekirgen áıeldi qutqardy
NUR-SULTAN. QazAqparat - Elordada kópirden Esil ózenine sekirip ketken boıjetken qutqaryldy, dep habarlaıdy QazAqparat.
Bul jaıynda qalalyq tótenshe jaǵdaılar departamentiniń baspasóz qyzmeti málimet taratty.
5 maýsym saǵat 13:46 kezinde 112 shuǵyl nómirine áıel adamnyń ózine qol jumsaý úshin Turan dańǵylyndaǵy kópirden Esil ózenine sekirgeni týraly habarlama kelip túsken.
Osy sátte atalǵan oqıǵanyń kýágeri, 1987 jyly týǵan Azamat Qamshybaev dereý sýǵa sekirip, es-tússiz jatqan áıel adamdy jaǵaǵa shyǵardy.
Sol ýaqytta elordalyq órt sóndirý qyzmetiniń qyzmetkerleri, azamattyq qorǵaý kishi serjanttary Danat Bekmaǵambetov pen Murat Amanjolov áıeldi qutqarý úshin kópir arqyly oń jaǵalaýǵa kómekke keldi.
Olarǵa qosylǵan jedel qutqarý jasaǵynyń qutqarýshylary Amangeldınov Islıambek, Omarov Máýlen jáne Kýltaev Arman birden alǵashqy medıtsınalyq kómek kórsetýge kiristi jáne uzaq júrek-ókpe reanımatsııasynan keıin birlesken kúsh-jigermen zardap shekken áıeldiń tynysy men júrek soǵysyn qalpyna keltirdi.
Áıel adam odan ári medıtsınalyq kómek kórsetý úshin jedel medıtsınalyq qyzmetke tapsyryldy.
Qutqarylǵan áıel №2 kópbeıindi qalalyq aýrýhanaǵa jatqyzyldy.
