Elordada jolaqyny tóleýge arnalǵan taǵy bir mobıldik qosymsha iske qosyldy
NUR-SULTAN. QazAqparat -Elordalyqtar taǵy bir mobıldik qosymsha arqyly qoǵamdyq kólikte jolaqyny tóleı alady, dep habarlaıdy QazAqparat tilshisi.
Tólemdi «Plus 24» mobıldik qosymshasynyń kómegimen avtobýstarda ornatylǵan QR-kodtardy skanerleý arqyly iske asyrýǵa bolady.
«Jolaqyny qosymshaǵa VISA/MASTERCARD tólem kartalaryn tirkeý arqyly tóleý múmkindigi bar», - dep habarlady «Astana LRT» JShS baspasóz qyzmetinen.
Kompanııa qazirgi tańda elordanyń qoǵamdyq kóliginde SMS/QR-kod boıynsha tólem jasaýdyń kelesi múmkindikteri baryn eske salady. Atap aıtqanda, QR-kod arqyly tóleý úshin tómendegi mobıldik qosymshalar bar:
1) Homebank (tek HalykBank jáne Qazkom kartalary úshin);
2) SMSBUS (telefon teńgerimi men bank kartasynan tóleýge bolady; kez kelgen bank kartasyn tirkeýge bolady);
3) My Beeline (Beeline abonentteri úshin, telefon teńgeriminen tólem);
4) «SENIM» mobıldik qosymshasy;
5) OYBY (bank kartasymen tólem jasaý; kez kelgen bank kartasyn tirkeýge bolady,) qosymshasy. Avtobýs salondarynda OYBY (Oıbaı!) úshin jeke QR-kod japsyrmalary bar.
Telefon teńgerimi arqyly SMS-pen tólem jasaý úshin 2505 nómirine habarlama jiberý (Activ/Kcell, Beeline, Tele2, Altel abonentteri úshin qoljetimdi) kerek.
Sonymen birge, «Astana LRT» kompanııasynyń málitinshe, elordalyqtardyń deni kólik kartalaryn «Qazposhta» bólimshelerinde toltyrýǵa bolatynyn bilmeıdi.
«Kólik kartasynyń teńgerimin qaladaǵy «Qazposhta»-nyń 34 bólimshesinde, 16 «Qazposhta» postamattarynda, 5 qala mańyndaǵy (Qosshy, Jibek Joly, Aqmol, Qabanbaı batyr jáne Qaraótkel) bólimshelerinde toltyrýǵa bolady. Kólik kartasyn qashyqtan toltyrýdyń bul tásili aktıvatsııany talap etedi», - delingen habarlamada.
