Elordada jol júrý bıletin qoldan jasaýshylardyń joly kesiledi
ASTANA. 7 qarasha. QazAqparat - Astanalyq kondýktorlardyń aıtýynsha, jol júrý bıletin qoldan jasaýshylar kóbeıip ketti. Mundaı jaǵdaıǵa kóbine-kóp stýdentter men oqýshylar urynatyn kórinedi. Óıtkeni jol júrý bıletin satyp alarda muqııat qaramasa, jasandy bılet pen túpnusqanyń aıyrmashylyǵyn baıqaý ońaı emes. Bul týraly elordanyń resmı saıty habarlady.
«Kondýktorlardan shaǵym túsken soń, jasandy jol júrý bıletin paıdalanýshylardy anyqtaý maqsatynda reıd ótkizýdemiz. Reıd barysynda avtobýstarǵa kirip, bıletterdi tekseremiz. Al onyń jasandy ne túpnusqa ekenin qarapaıym ádispen bilýge bolady. Eger bıletti jyrtyp kórseńiz, túpnusqa plastıkti materıaldan jasalǵan soń jyrtýǵa kelmeıdi. Al jasandy bılet kádimgi qaǵazdan kóshirip basý ádisi arqyly jasalady. Demek, jyrtylýy da ońaı. Bul - tekserýdiń bir ǵana ádisi. Mamandar mundaı zań buzýshylyqty joıý úshin bar múmkindikti paıdalanýda», - dedi «Jolaýshylar tasymaly» ortalyǵy JShS basshysy Naǵashybaı Shalmanov. Jasandy jol júrý bıletin jasaýshylarmen kúres qazan aıynan bastalǵan. Ázirge quqyq qorǵaý organdaryna jetkizilgen 5 fakti tirkelgen. Al ekinshi másele ózge bireýdiń ataýly jol júrý bıletin paıdalanýshylarǵa qatysty. Júrgizilgen reıd barysynda mundaı bir jaǵdaı tirkeldi. Endi áshkere bolǵan jigit ózgeniń ataýly bıletin qoldanǵany úshin jaýap berýi kerek. Mundaı keleńsizdikti boldyrmas úshin mamandar tek qana belgilengen oryndardan ǵana jol júrý bıletin satyp alýǵa keńes beredi.
