Elordada serýen joly opyrylyp túsip, boıjetken zardap shekti

ASTANA. KAZINFORM — Astananyń sol jaǵalaýynda trotýar opyrylyp ketip, boıjetken jaraqat aldy.

Aldymen zardap shekken astanalyq boıjetkenniń jaǵdaıyn Qoǵamdyq densaýlyq saqtaý basqarmasynan suradyq. 

— Jedel járdem brıgadasy naýqasqa oqıǵa ornynda alǵashqy medıtsınalyq kómek kórsetti. Patsıent aýrýhanaǵa jatýdan bas tartty, — degen habar aldyq basqarmadan.

Aqparatta aıtylǵandaı, oqys oqıǵa Kereı-Jánibek kóshesindegi «Qobyz» saraıy mańyndaǵy aıaldamada bolǵan. Atalǵan jaıtqa qatysty Astana sý arnasy mekemesi de túsinik berdi.

— 26 mamyrda Kereı-Jánibek handar kóshesi, 18 mekenjaıy mańynda («Qobyz saraıy» janynda) D-1000 mm kollektordyń janynan trotýar taqtasy shógip, oıyq paıda boldy. Oıyqtyń túbinde sý jınalǵan. Oqıǵa ornyna «Astana sý arnasy» mekemesiniń brıgadasy jedel jetti, — delingen habarlamada. 

Qazir tehnıkalyq tekserý jumysy júrip jatyr, jaǵdaı baqylaýǵa alyndy. 

— Oqıǵanyń mán-jaıy atqarylǵan jumystyń nátıjesi boıynsha anyqtalady. Keltirilgen qolaısyzdyqtar úshin keshirim suraımyz jáne qala turǵyndaryna túsinistik tanytqandary úshin alǵys aıtamyz, — deıdi Astana sý arnasynan.

Buǵan deıin Astanada fýtbol jankúıerleri jappaı tóbelesti, janjaldyń jelide taraǵan vıdeosy sotta qaraldy.