Elordada «Jol ústindegi qabyldaý» respýblıkalyq aktsııasy ótti
Astana qalasynyń ІІD jáne «Nur Otan» partııasynyń bastamasymen elordada «Jol ústindegi qabyldaý» jyl saıynǵy respýblıkalyq aktsııasy bastaldy. Aktsııa halyqqa quqyqtyq bilim berip, qoǵamdyq jáne jol qaýipsizdigin qamtamasyz etý boıynsha atqarylyp jatqan jumystar týraly kópshilikti aqparattandyrýǵa baǵyttalǵan, dep habarlaıdy QazAqparat astana.gov.kz saıtyna silteme jasap.
Búgin Astanalyq jergilikti polıtsııa qyzmetiniń jáne ІІD Ákimshilik polıtsııa basqarmasynyń mamandary birneshe jerde azamattardy qabyldady. Atap aıtqanda, «Báıterek» monýmentiniń aldynda, elordanyń mamandandyrylǵan HQKO-synda, Almaty, Saryarqa jáne Esil aýdandarynyń Іshki ister basqarmalarynda, «Artem» saýda úıiniń aldynda jáne temirjol vokzalynyń aýmaǵynda.
«Azamattardyń ótinishteri boıynsha bizdiń mamandar jedel túrde áreket etýge tyrysady, kóbinese suraqtar sol jerde nemese jazbasha túrde túsken sátten bastap 3 kúnniń ishinde sheshimin tabady. Osylaısha, biz halyqpen júrgiziletin jumystyń tıimdiligin arttyramyz. Osy joly men azamattardyń usynystary men tilekterin, jol qaýipsizdiginiń problemalaryna usynystaryn óz kózimmen kórip bilýge bel býdym», - dedi Astana qalasy ІІD jergilikti polıtsııa qyzmetiniń bastyǵy Baqytjan Malybaev.
Sonymen qatar, jol-patrýldik qyzmettiń jumysyn jaqsartý maqsatynda «Shep» baqylaý júıesiniń beketterinde, sondaı-aq, aktsııa ótetin barlyq oryndarda jol-patrýldik polıtsııa qyzmetkerleri azamattar arasynda konstıtýtsııalyq-quqyqtyq zańnamany saqtaý boıynsha saýalnama júrgizdi.
Shara barysynda bir saǵattyń ishinde qala turǵyndarynan 30 ótinish kelip tústi. Sonyń ishinde qarbalas saǵattarda jol polıtsııasy qyzmetkerleriniń kóshe qozǵalysyn qolmen retteýiniń tıimdiligine, jańa aýdandarda qosymsha baǵdarshamdar men jaıaý júrginshi ótkelderin ornatý, qaladaǵy kólik aǵynyn azaıtý, kólik keptelisterimen kúres máseleleri kóterildi.
«Jyl saıyn polıtsııa qyzmetkerleri azamattardan 600-ge jýyq ótinish qabyldaıdy. Sonyń 60-70 % aktsııa ótkizilgen sátte pysyqtalady», deıdi elordalyq ІІD Ákimshilik polıtsııasy basqarmasynyń mamandary.
