Elordada jol-kólik oqıǵalary jıi tirkeletin kósheler ataldy
NUR-SULTAN. QazAqparat – Nur-Sultan qalalyq Polıtsııa departamentiniń ákimshilik praktıka bóliminiń aǵa ınspektory Eldor Raıymbekov elordadaǵy jol-kólik oqıǵalary jıi tirkeletin kóshelerdi atady, dep habarlaıdy QazAqparat tilshisi.
«Álbette, qala kósheleri boıynsha árdaıym taldaý jumystary júrgizilip turady. Jol-kólik oqıǵalary kóbirek tirkeletin aýmaqtar bar. Máselen, Táýelsizdik pen Pýshkın kósheleriniń qıylysynda avtokólikter kóbinese solǵa burylǵan kezde qarsy kele jatqan kólikti jibermeı jatady. Osynyń saldarynan betpe-bet soqtyǵysady. Baýyrjan Momyshuly kóshesi men Táýelsizdik kósheleriniń, Abylaı han men Momyshuly kósheleriniń qıylysynda da sondaı jaǵdaı. Ásirese, úlken kóshelerdiń qıylysynda jol-kólik oqıǵalary jıirek tirkeledi», - dedi Eldor Raıymbekov.
Onyń aıtýynsha, úlken kóshelerdiń qıylysynda baǵdarshamnyń qıylysynda qyzyl shamy janǵannan keıin stop syzyqqa toqtaýy tıis. Alaıda júrgizýshiler keıde asyǵyp, jol-kólik oqıǵalaryna ushyrap jatady.
«Qysta kólikter ózara qashyqtyqty saqtaı bermeıdi. Jol-kólik oqıǵalarynan zardap shekkender aýrýhanaǵa jetkizilse, bizge, ıaǵnı «102» nómirine birden habarlama kelip túsedi. Osydan keıin kezekshi bólimder zardap shegýshiden jaýap alyp, materıaldardy iske tirkep, ákimshilik sotqa joldaıdy», - dedi ol.
