Elordada jol-kólik apaty kúrt artty
NUR-SULTAN. QazAqparat – Elordada aýa raıynyń nasharlaýyna baılanysty qala joldarynda kólik apattarynyń sany kúrt artyp ketti, dep habarlaıdy QazAqparat tilshisi.
Nur-Sultan qalalyq Polıtsııa departamenti Ákimshilik polıtsııa basqarmasy elorda aýmaǵynda bir táýliktiń ishinde tirkelgen jol-kólik oqıǵalaryna saraptama júrgizgen. Oǵan táýlik ishinde 70 jol-kólik oqıǵasynyń tirkelip, mundaı jaıttardyń 30 paıyzǵa artýy túrtki bolǵan.
«Nur-Sultan qalalyq Polıtsııa departamenti aýa raıyna baılanysty júrgizýshilerden kólikpen qozǵalys barysynda barynsha tyńǵylyqty ári abaı bolýǵa, jyldamdyq rejımin, qaýipsiz araqashyqtyqty jáne manevr jasaý erejesin buljytpaı saqtaýǵa shaqyrady. Júrgizýshi úshin jańbyrdyń alǵashqy tamshylary óte qaýipti sanalady. Jol jabyndysy shań-tozańdy, onyń ústine kúzgi japyraqtardyń túsýi bastaldy. Mundaı jaıt jınala kele kólik quralynyń toqtaý jolyn arttyra túsedi. Sol sebepti kúrt manevr jasaýdan jáne tejegishti kenetten basýdan saq bolý qajet. Jańbyr kórinisti tómendetedi jáne barynsha muqııat bolý qajet. Jańbyr nemese qar jaýyp turǵan kezde jaıaý júrginshi jaqyndap qalǵan kólik quralyn baıqamaı qalýy múmkin. Mundaı jaǵdaıda keıde jaıaý júrginshi shalt qımyldaýy da yqtımal», - dep atap ótedi departamentten.
Osyǵan oraı PD júrgizýshilerge jaıaý júrginshi ótetin jolaqqa jaqyndaǵan kezde kólik jyldamdyǵyn barynsha tómendetip, saq bolý qajettigin eskertedi.
