Elordada jol boıyna qoqys tastaǵan 7 myńnan astam júrgizýshi jazalandy
ASTANA. 25 sáýir. QazAqparat - Elordalyq polıtsııa qyzmetkerleri usaq tártip buzýshylyqqa «nóldik tózimdilik» qalyptastyrý jumystaryn jalǵastyrýda.
Jyl basynan beri usaq tártip buzaqylyq jasap, qoǵamdyq oryndarda qoqys tastaǵany úshin 150-ge tarta adam ákimshilik qamaýǵa alyndy, - dep habarlaıdy astana.kz saıty qalalyq ІІD-ge silteme jasap.
«Jyl basynan beri barlyǵy 15 myńǵa tarta ákimshilik tártip buzýshylyq anyqtalyp, jol boıyna qoqys tastaǵany úshin 7 myńnan astam júrgizýshi jazalandy. Osy ákimshilik jazalar úshin olarǵa 68 mıllıon teńge kóleminde aıyppul salyndy», - delingen vedomstvo habarlamasynda.
Sondaı-aq qalanyń abattandyrý erejesin buzǵan adamdar da jazadan tys qalmady. Osy jyldyń birinshi toqsanynda PIK-terdiń 30-dan astam basshysy men 20 shaqty merdigerlik uıym ákimshilik jaýapkershilikke tartyldy.
Aldyn alý sharalary retinde joǵary oqý oryndary men basqa da jerlerde sot májilisterin ótkizý tájirıbege engizilip keledi.
