Elordada jol aqysyn tóleýdiń jańa júıesi engiziledi

NUR-SULTAN. QazAqparat – Elordadaǵy «City Transportation Systems» JShS-da qalalyq máslıhat depýtattaryna qoǵamdyq kólikte jol aqysyn elektrondy tóleýdiń jańa júıesi tanystyryldy, dep habarlaıdy QazAqparat tilshisi.

«Depýtattyq korpýs retinde, bul salanyń ashyq bolýyna mán berip otyrmyz. Sondyqtan sheshim qabyldaý kezinde júıeniń sapasy men tıimdiligine erekshe ekpin qoıylǵan. Jańa júıeniń negizgi ólshemsharty retinde oǵan jyldam ári birqalypty ótý, jol aqysyn tıimdi baqylaý jáne jeńildigi bar sanattaǵy azamattarǵa qolaıly jaǵdaı jasaý eskerilgen», - dedi Nur-Sultan qalasy máslıhatynyń depýtaty Vladıslav Sergeev.

Atap aıtqanda, qazirgi kezde qyzmet kórsetýshiler arasynda birneshe kompanııa bar – «Innoforce solutions» (Avtobys) JShS, «SMSBUS» JShS, «BPTs Qazaqstan» jáne «Tehnodata» JShS konsortsıýmy. Sonymen qatar, depýtattarǵa óz júıesin qarastyrý úshin «Almaty qalasynyń kólik holdıngi» JShS «Ońaı» júıesin usyndy.

Ár kompanııa ózderi usynyp otyrǵan jol aqysyn tóleý júıesiniń artyqshylyǵymen tanystyrdy. Osy oraıda VISA jáne Mastercard bank kartalarymen, NFC júıesimen jabdyqtalǵan smartfon arqyly, Bluetooth jáne basqa da tólem júıesi qamtylǵan. Jolaqy tóleýdiń jańa júıesi kólik kartalaryn toltyrýdyń onlaın rejımine kóshýdi de qamtıdy.

Belgili bolǵandaı, búgingi tańda astanada qoǵamdyq kóliktegi jolaýshylar aǵyny ortasha 650 myń sapardy qurap otyr. Jolaýshylar jol aqysyn eki jolmen tóleı alady – bul kólik kartasymen jáne QR-kodty skanerleý arqyly. Ol úshin ártúrli qosymshalar bar (Transcard, Kaspi.kz, Homebank, uıaly baılanys operatorlarynyń qosymshalary jáne taǵy basqa). Jol júrý quny 7 jyl boıy 90 teńge deńgeıinde saqtalǵan.

Budan buryn habarlanǵandaı, ótken jyldyń 18 qazanynan bastap elordada birneshe qoǵamdyq kólik baǵdarlarynda pılottyq rejımde úsh kásiporynnyń jol aqysyn tóleýdiń jańa júıesi testileýden ótip jatyr. Árbir júıe egjeı-tegjeıli qarastyrylyp, olardyń eń tıimdisi, sondaı-aq jolaýshylar úshin qolaılysy anyqtalatyn bolady.