Elordada joǵary tehnologııalar salasyndaǵy eki birdeı kórme ashyldy
STANA. Sáýirdiń 1-i. QazAqparat /Marlan Jıembaı/ - Búgin elordadaǵy «Kórme» halyqaralyq ortalyǵynda eki birdeı kórmeniń, atap aıtqanda «BookExpoAstana-2010» halyqaralyq kitap jármeńkesiniń jáne «e-KAZAKHSTAN-2010» 3-shi halyqaralyq aqparattyq-kommýnıkatsııalyq tehnologııalar kórme-forýmynyń ashylý rásimi ótti.
Sharanyń ashylý rásimine qatysqan Aqparat jáne baılanys vıtse-mınıstri Sáken Sársenov «Qazirgi álemdegi aqparattyq tehnologııalar bizdi jan-jaǵymyzdan qorshap tur. Zamana aǵymyna ilesken kez kelgen azamat aqparattyq tehnologııalarsyz óz ómirin eleste de almaıdy», dep atap ótti.
Elorda tórinde alǵash ret uıymdastyrylǵan «BookExpoAstana-2010» halyqaralyq kitap jármeńkesi qalanyń mádenı jáne iskerlik ómirindegi mańyzdy oqıǵalardyń biri. Onda kitap ındýstrııasyna tikeleı qatysy bar baspagerdi, qalamgerdi, kitaphanashyny, kitap satýshyny da kezdestiresiz. Jármeńkeden ǵylymı, ádebı, dinı kitaptarmen qatar balalar ádebıetine qatysty shyǵarylǵan baspa ónimderin satyp alýǵa múmkindigińiz mol. «Nur Otan» HDP-nyń uıytqy bolýymen Astanada alǵash ret uıymdastyrylǵan sharaǵa elimizdiń, sondaı-aq Reseı men basqa da memleketterdiń baspagerleri óz ónimderin usynǵan. Olardyń qatarynda otandyq Almatykitap, Dáýir, Atamura, reseılik Karapýz, Komıks, Informnaýka, túrkııalyq Imak Ofser syndy kompanııalar bar.
Al «e-KAZAKHSTAN-2010» halyqaralyq aqparattyq-kommýnıkatsııalyq tehnologııalar 3-shi kórme-forýmy oǵan qatysýshylarǵa jınaqtalǵan tájirıbelerin talqylaýǵa, perspektıvaly jobalary men salany damytýdyń baǵyttary aqparattandyrýǵa mol múmkindik berip, otandyq baılanys jáne telekommýnıkatsııalar óndirisine tyń serpin beredi. Bul kórmege de memlekettik damý, qarjy, konsaltıngtik uıymdarmen qatar reseılik kompanııalar da qatysýda.
Eki kórme de sáýirdiń 3-ine deıin jalǵasady.
