Elordada jylý energııasy boıynsha tarıf ózgerýi múmkin
ASTANA. KAZINFORM — Búgin elordada «Astana-Teplotranzıt» AQ–nyń ótinimi aıasynda jylý energııasy boıynsha retteletin qyzmetke tarıfti bekitýge qatysty qoǵamdyq tyńdaý ótti.
— «Jylý energetıkasy týraly» Zańynyń 25-baby 3-tarmaǵyna sáıkes, 2025 jylǵy 1 shildeden bastap «Astana-Teplotranzıt» AQ-ǵa jylý energııasyn tutynýshylarǵa satý fýnktsııalary beriledi. Qazirgi kezde aktsonerlik qoǵam kelesi retteletin qyzmet túrleri boıynsha tabıǵı monopolııa sýbektisi sanalady: jylý energııasyn berý jáne bólý, sondaı-aq jylý energııasymen qamtamasyz etý. Ulttyq ekonomıka mınıstriniń 2019 jylǵy 19 qarashadaǵy № 90 buıryǵymen bekitilgen Tarıfterdi qalyptastyrý qaǵıdalarynyń 302-tarmaǵyna sáıkes, «Astana-Teplotranzıt» 2025 jylǵy 1 shildeden bastap 2025 jylǵy 31 jeltoqsanǵa deıin kúshine enetin jeńildetilgen tártipte jylý energııasyn jetkizý tarıfin bekitýge ótinim daıyndady, — dedi «Astana-Teplotranzıt» AQ basqarma tóraǵasynyń orynbasary Serik Amangeldınov.
Onyń aıtýynsha, 2025 jylǵa arnalǵan bekitilgen óndiristik baǵdarlamaǵa sáıkes, rettelip kórsetiletin qyzmet kólemi jylyna 9 mln 178 myń 588 Gkal shamasynda josparlanǵan. Jalpy, jylý energııasyn jetkizýge jumsalǵan shyǵyndar 2 mlrd 542 mln 520 myń teńgeni qurady.
— Jylý energııasyn qamtamasyz etý tarıfiniń jobasy «Astanaenergosbyt» JShS-nyń qoldanystaǵy tarıfinen QQS-syz 65,6 teńge/Gkal-ǵa nemese 30,9 paıyzǵa ósýmen QQS-syz 1 Gkal úshin 278,13 teńgege jetedi. Ortasha satý tarıfiniń ósýi QQS-syz 65,5 teńge/Gkal nemese 1,4%-dy qurady, — dedi S. Amangeldınov.
Onyń sózine qaraǵanda, QR Ulttyq ekonomıka mınıstriniń 2019 jylǵy qarashadaǵy buıryǵymen bekitilgen Tarıfterdi qalyptastyrý qaǵıdalarynyń 272-1-tarmaǵynda jalpy aýdannyń mólsherin eskere otyryp, jylý energııasyn tutynýdyń áleýmettik lımıtterin belgileý sheńberinde birinshi top tutynýshylary, halyq sanatyna jatatyn jeke tulǵalar úsh kishi topqa bólinedi:
— 1-kishi top — halyq sanatyna jatatyn jeke adamdar, jylytylatyn aýdan 100 sharshy metrge deıin;
— 2-kishi top — halyq sanatyna jatatyn jeke adamdar, jylytylatyn aýdan 100-den astam jáne 200 sharshy metrge deıin;
— 3-kishi top — halyq sanatyna jatatyn jeke adamdar, jylytylatyn aýdan 200 sharshy metrden astam.
«Astana-Teplotranzıt» AQ málimetinshe, 1-kishi top úshin tarıf eń tómengi deńgeıde, 2-kishi top úshin onyń deńgeıi 10 paıyz joǵary bolsa, al 3-kishi top ortasha ótkizý tarıfinde eń joǵary deńgeıde tóleıdi.
Atap aıtqanda, osy dıfferentsıatsııa turǵyndardyń 90 paıyzyna qatysty bolmaıdy. Sebebi qaladaǵy tutynýshylardyń basym bóligi 100 sharshy meterge deıingi páterlerde turyp jatyr. Sondyqtan saralanǵan tásil baspanasy 100 sharshy metrden asatyn 10 paıyz turǵyndy qamtıdy. Bul turǵyda páteri 200 sharty metrden asatyn turǵyndar 1 paıyzdy quraǵan.
«Astana-Teplotranzıt» osy ótinimin QR UEM Tabıǵı monopolııalardy retteý komıtetiniń Astana qalasy boıynsha departamentine usyndy. Departament ony áli bekitken joq.
Eske salsaq, buǵan deıin Astanada sarqyndy sýǵa qatysty tarıf ósýi múmkin ekenin jazǵan edik.