Elordada jyl saıyn 300-400 zańsyz qoqys alańy anyqtalady
ASTANA. KAZINFORM — Búgin Astana qalalyq máslıhatynyń kezekti otyrysynda 2025-2029 jyldarǵa arnalǵan kommýnaldyq qaldyqtardy basqarý baǵdarlamasy maquldandy.
Atalǵan qujat boıynsha negizgi baıandama jasaǵan Astana qalalyq qorshaǵan ortany qorǵaý jáne tabıǵatty paıdalaný basqarmasynyń bastysy Dáýlet Dosqulov baǵdarlamanyń maqsaty qaldyqtardy basqarý salasyndaǵy birqatar problemany sheshý ekenin aıtady.
— Birinshi másele — qoqys kóleminiń artýy. 2023-2024 jyldary shamamen 550 myń tonna qoqys paıda bolsa, 2025 jyldyń sońyna deıin onyń kólemi 600 myń tonnadan asady dep kútiledi. Sebepteri — halyq sanynyń ósýi, belsendi turǵyn úı qurylysy. Ekinshi másele — qaldyqtardy suryptap jınaý júıesin engizýdegi qıyndyqtar. Qazirgi ýaqytta halyqtyń 40 paıyzǵa jýyǵy ǵana osy júıege qatysady. Qaldyqtardy aralastyryp jınaý paıdaly fraktsııalardyń — plastık, shyny, qaǵazdyń azyq-túlik qaldyqtarymen aralasyp ketýine jol beredi. Bul olardyń qaıta óńdelýin qıyndatady. Sebepteri — ınfraqurylymnyń jetispeýshiligi, ekologııalyq mádenıettiń tómen deńgeıi, yntalandyrýdyń joqtyǵy, qyzmet kórsetý sapasynyń tómendigi. Úshinshi másele — qaldyqtardy suryptaý men qaıta óńdeýdiń tómen deńgeıi. 2024 jyly tek 17 paıyz qaldyq suryptalyp, qaıta óńdeýge jiberildi. Qatty turmystyq qaldyqtardyń ekinshi uıashyǵy tolyǵymen tolǵan. Al úshinshi uıashyq resýrsy mundaı qarqynmen 2028-2029 jyldar taýsylady, — dedi Dáýlet Dosqulov.
Ol jyl saıyn anyqtalatyn 300-400 zańsyz qoqys polıgondaryn taǵy bir másele retinde atady.
Dáýlet Dosqulovtyń aıtýynsha, baǵdarlamada 2029 jylǵa deıingi nysanaly kórsetkishter belgilengen. Qoıylǵan mindetterdi sheshý úshin fraktsııalarǵa arnalǵan konteınerlerdi markileý, shyǵarý kestesi kórsetilgen QR-kodtardy ornatý sııaqty sharalar qarastyrylǵan. Jyl saıyn 500 jańa metall konteıner jáne 600 sary, 600 jasyl plastık konteıner satyp alý josparlanǵan. Sonymen qatar, qatty turmystyq qaldyqtardy suryptap shyǵarýǵa arnalǵan arnaıy tehnıka parkin jańartý, konteıner alańdarynyń sanıtarlyq normalarǵa sáıkestigin baqylaý jáne olardy 2029 jylǵa deıin qaıta qurý kózdelgen.
Munan bólek, qujatta qaldyqtardy suryptaý men qaıta óńdeýdi damytý qarastyrylǵan. Ol úshin 8 ınvestıtsııalyq joba men 1 memlekettik-jekemenshik áriptestik jobasy iske asyrylady.
Buǵan deıin elordada ruqsatsyz qoqys úıindilerin joıý jáne quqyq buzýshylardy anyqtaý boıynsha júıeli jumys júrgizilip jatqanyn jazǵan edik.