Elordada jyl basynan beri qurylys salasynda 160 mln teńgeden astam aıyppul salynǵan
ASTANA. KAZINFORM – Elordada jyl basynan beri qurylys salasyndaǵy zańnama talaptarynyń saqtalýyn baqylaý aıasynda eki júzden astam jospardan tys tekserý júrgizilgen. Bul týraly Astana qalasynyń Memlekettik sáýlet-qurylys baqylaýy basqarmasynyń basshysy Ǵanı Tájıev málim etti.
Atap aıtqanda basqarma basshysy 2026 jyldyń basynan beri qurylys salasyndaǵy zańnama talaptarynyń saqtalýyn qamtamasyz etý baǵytynda memlekettik baqylaý aıasynda birqatar jumys atqarylǵanyn atap ótti.
– Búgingi kúnge deıin jeke jáne zańdy tulǵalarǵa qatysty 228 jospardan tys tekserý júrgizildi. Anyqtalǵan zańbuzýshylyqtardy joıý jóninde oryndalýy mindetti 122 nusqama berildi. Baqylaý sýbektilerine jalpy somasy 164 mln teńgeden asatyn 501 ákimshilik aıyppul salyndy, – dedi Ǵanı Tájıev.
Sonymen qatar spıkerdiń aıtýynsha, qazirgi ýaqytta elordada 1542 qurylys nysany iske asyrylyp jatyr. Onyń ishinde 434-i – kóppáterli turǵyn úı keshenderi.
- Qalada qurylys qarqyny jyl saıyn artyp keledi. Bıyl 4,8 mln sharshy metr turǵyn úıdi paıdalanýǵa berý josparlanǵan. Búgingi kúnge deıin onyń 1,5 mln sharshy metri paıdalanýǵa tapsyryldy, – dedi basqarma basshysy.
Sondaı-aq spıker elordadaǵy qurylys salasyndaǵy ózekti máselelerdiń biri bolyp sanalatyn zańsyz qurylysqa qarsy kúreske erekshe nazar aýdarylyp otyrǵanyn jetkizdi.
- 2024–2025 jyldary kóppáterli turǵyn úı keshenderiniń zańsyz qurylysyna qatysty 40 nysan anyqtaldy. Qazirgi ýaqytta olardyń sany 21 nysanǵa deıin qysqardy. Onyń ishinde 3 nysan paıdalanylyp jatyr. Al qalǵan 18 nysanda qurylys-montaj jumystary toqtatylǵan, – dedi ol.
Aıta keteıik, Almatyda 214 qurylys kompanııasynyń lıtsenzııasy toqtatyldy.
