Elordada jyl basynan beri qansha esirtki tárkilengeni belgili boldy
ASTANA. KAZINFORM — Astana qalasy Polıtsııa departamenti Esirtki qylmysyna qarsy is-qımyl basqarmasynyń bólim bastyǵy Álııa Qıbatqyzy psıhotroptyq zattardy taratý men satýdyń jolyn kesý boıynsha atqarylyp jatqan jumystar jóninde málimdedi.
Mamannyń sózinshe, bıyl elordada zańsyz esirtki aınalymyna qatysty 446 quqyqbuzýshylyq anyqtalǵan. Onyń 161-i — esirtkini zańsyz satýmen aınalysqan azamattarǵa qatysty ister.
Sonymen qatar, jyl basynan beri Astanada 71 keli ártúrli esirtki zattary tárkilengen. Byltyr bul kórsetkish 101 keli bolypty.
— Qazir kannabıstik jáne apıyndyq esirtkilerge suranys tómen. Sebebi, sońǵy 8 jylda sıntetıkalyq esirtkiler keń tarady. «Sıntetıkanyń» baǵasy arzan emes jáne onyń nashaqorǵa beretin áseri marıhýana, gashısh, geroınge qaraǵanda anaǵurlym kúshti. Sondyqtan zańsyz esirtki saýdasymen aınalysatyndar aýqatty otbasynan shyqqan jastardy esirtki tutynýǵa kóp tartady, — deıdi Álııa Qıbatqyzy.
Al psıhotroptyq zattardy satýǵa jáne taratýǵa qaraý nıetti jandar 16-30 jas aralyǵyndaǵy aqyl toqtata qoımaǵan ári qaltasy juqa jastardy qyzyqtyrýǵa tyrysady. Ol úshin aptasyna myń dollarǵa deıin usynyp, «márttik» tanytady. Biraq onyń bári — qaqpan. Ondaı iri soma bermek túgili, keıde tipti aqshasyn múlde tólemeı qoıyp jatady.
— Biz mektep, kolledj, ýnıversıtetterge jastarmen kezdesýge barǵanda, árdaıym eskertemiz. Esirtki taratýshynyń «mansaby» ári ketse, 1-2 aıǵa ǵana sozylady, sosyn quryqtalady. Eshkim 1-2 jyl «zakladchık» bolyp júre almaıdy, tez qolǵa túsedi, — deıdi bul salada 15 jyldyq tájirıbesi bar Álııa Qıbatqyzy.
Onyń sózinshe, esirtki tutyný, taratý, satýdyń aldyn alý úshin bıyl elordada 300-den astam is-shara jáne túrli kezdesýler uıymdastyrylǵan.
Aıta keteıik, buǵan deıin Astanada tirkeýde turǵan nashaqorlardyń sany jóninde jazǵanbyz.
