Elordada jyl basynan beri 338 zańsyz qoqys orny joıyldy
ASTANA. KAZINFORM — Jyldyń basynan beri elorda aýmaǵynda 338 zańsyz qoqys orny anyqtalyp, tolyqtaı joıyldy. Atalǵan aýmaqtardan polıgondarǵa 400 myń tonnadan astam qaldyq shyǵaryldy. Bul týraly qala ákimdiginiń saıty jazdy.
Qaladaǵy barlyq aýdanda kún saıyn monıtorıng júrgizilip jatyr, zańsyz qoqys úıindilerin anyqtaý jumysy turaqty baqylaýda.
Atap aıtqanda, Almaty aýdanynda 30 ýchaske tazartylyp, shamamen 25 myń tonna qoqys shyǵaryldy.
Baıqońyr aýdanynda 47 oryn joıylyp, 40 myń tonna qaldyq polıgondarǵa jetkizildi.
Esil aýdanynda 89 zańsyz qoqys orny joıylyp, 150 myń tonnadan astam qoqys shyǵaryldy.
Saryarqa aýdanynda 19 oryn tazartylyp, shamamen 32 myń tonna qoqys shyǵaryldy, jumys jalǵasyp jatyr.
Nura aýdanynda 104 orynnan 104 myń tonna qoqys shyǵaryldy.
Al Saraıshyq aýdanynda 49 zańsyz qoqys orny joıylyp, 50 myń tonna qaldyq polıgondarǵa jetkizildi.
IKomek júıesi arqyly qurylys alańdarynan qoqysty zańsyz tasymaldaý jáne belgilenbegen jerlerge tógý derekteri anyqtalyp, quqyq qorǵaý organdarymen birlesken reıdtik is-sharalar júrgizilmek.
— Osy jyldyń 11 aıynda qoqysty ruqsatsyz tókkeni úshin júk kóliginiń 43 júrgizýshisi ákimshilik jaýapkershilikke tartylyp, jalpy somasy 11 mıllıon teńgeden astam aıyppul salyndy. Al abattandyrý talaptaryn buzǵany úshin 31 952 quqyq buzýshyǵa 53 mıllıon 590 myń teńgeden astam aıyppul salyndy. Qoǵamdyq oryndardy lastaǵany úshin ÁQBtK-niń 434-2-baby boıynsha 13 276 adam jaýapqa tartylyp, 446 mıllıon teńge kóleminde aıyppul óndirildi, — delingen habarlamada.
Zańsyz qoqys oryndaryn joıý jumysy jalǵasyp, jańa oshaqtardyń paıda bolýyna jol bermeý sharalary qabyldanyp jatyr.
Sonymen qatar elordada «Taza Qazaqstan. Astana — tazalyq pen tártiptiń úlgisi» aktsııasy aıasynda sanıtarlyq tazalaý jumysy júrgizilýde. Aktsııa aıasynda kósheler, trotýarlar, aýla aýmaqtary, qoǵamdyq keńistikter, sondaı-aq nóser jáne aryq júıeleri tazartylyp jatyr.