Elordada jyl basynan beri 32 bala terezeden qulaǵan

ASTANA. KAZINFORM – Jyl basynan beri elordada 5 sábı terezeden qulap, ajal qushqan.

Tolyǵyraq Astana qalasy TJD Tótenshe jaǵdaılardyń aldyn alý basqarmasynyń bastyǵy Baqytjan Máýlenberdıev aıtyp berdi.

«Jyl saıyn balalardyń jaraqat alý jaǵdaıy artyp barady. Onyń qatarynda balalardyń terezeden qulaýy da bar. Kóbine mundaı jaǵdaılar ata-ananyń balalardy qaraýsyz qaldyrýymen baılanysty. Jyl basynan beri Astana qalasy boıynsha «112» pýltine balalardyń terezeden qulaýy jazataıym oqıǵalary týraly 32 habarlama tústi. Onyń ishinde 5 bala qaıtys boldy, 4 sábıge ambýlatorııalyq kómek usynyldy jáne 23 bala ártúrli dárejedegi jaraqatyn alyp aýrýhanaǵa jatqyzyldy», - dedi Baqytjan Máýlenberdıev Astana qalasynyń kommýnıkatsııalar qyzmeti alańynda ótken baspasóz máslıhatynda.

Tótenshe jaǵdaılar departamenti qyzmetkerleri elorda turǵyndaryna jadynamalar taratyp, oqys jaıttardyń aldyn alý boıynsha túsindirý jumystaryn ótkizip jatyr.

«Búginde mamandar 3 myńnan astam kóppáterli turǵyn úıdi aralady. Ár úıdiń kireberisi men lıftilerge 12 myńnan dana astam jadynama japsyryldy. 15 075 turǵynǵa qaýipsizdik erejeleri túsindirildi», - deıdi TJD ókili.

Eske sala keteıik, taıaýda elordada bir jasar búldirshin terezeden qulap, aýrýhanaǵa jetkizilgeni týraly habarlaǵan edik. 

Keıin dárigerler terezeden qulaǵan sábıdiń jaǵdaıy týraly málimetpen bólisti. 

Aıta ketsek, Tótenshe jaǵdaılar mınıstrliginiń shildedegi málimeti boıynsha, jyl basynan beri 100-den astam bala terezeden qulap ketken.