Elordada jyl basynan beri 300-den astam esirtkige qatysty qylmys anyqtaldy
ASTANA. KAZINFORM – Elordada 2024 jyldyń 10 aıynda 300-den astam esirtki qylmysy tirkeldi, onyń ishinde 250-ge jýyǵy – ótkizý faktisi boıynsha. Zańsyz aınalymnan 300 keliden astam túrli esirtki zattary tárkilendi. Bul týraly Kommýnıkatsııalar qyzmetinde ótken brıfıngte Astana polıtsııa departamenti esirtki qylmysyna qarsy is-qımyl basqarmasy bastyǵynyń mindetin atqarýshy Erkesh Qalyqov aıtyp berdi, dep habarlaıdy qalalyq ákimdiktiń resmı saıty.
Onyń aıtýynsha, esirtkige qarsy is-sharalar boıynsha ınternet-keńistikke monıtorıng júrgiziledi. Bir jylǵa jýyq ýaqyt ishinde 200-ge jýyq saıt buǵattalǵan.
«Esirtkini jarnamalaıtyn graffıtılerdi joıý jumystary júrgizilýde. Qazirgi ýaqytta «Esirtkige jol joq!» atty «Smart Astana» mobıldi qosymshasy bar. Esirtki taratý faktileri boıynsha 21 qylmystyq is qozǵalyp, 5 adam ýaqytsha ustaý ızolıatoryna qamaldy», - dedi Erkesh Qalyqov.
Memleket basshysynyń tapsyrmasy boıynsha nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi jospary ázirlenip, qabyldanǵan bolatyn. Osyǵan baılanysty «Astana – esirtkisiz qala 2024-2025 jyldarǵa arnalǵan» baǵdarlamasy iske asyrylýda, oǵan memlekettik organdar men jurtshylyq barynsha tartylǵan, esirtkige qarsy is-sharalardyń tutas kesheni ázirlengen.
«Esirtki qylmysyna qarsy is-qımyl máseleleri vedomstvoaralyq shtab otyrystarynda qaralady. Aldymen bıyl Departament ákiminiń orynbasary men basshylyǵynyń tóraǵalyǵymen 9 MVSh otyrysy ótkizildi, onda birqatar túıtkildi másele men olardy sheshý joldary qaraldy. Departament memlekettik organdarmen birlesip, nashaqorlyqqa jáne esirtki qylmysyna qarsy kúres boıynsha turaqty jumys júrgizýde. Bul jumysqa tek memlekettik organdar ǵana emes, úkimettik emes uıymdar men eriktiler de óz úlesterin qosýda, olarmen birge jyl basynan beri 450-den astam profılaktıkalyq is-shara ótkizdi», - deıdi esirtki qylmysyna qarsy is-qımyl basqarmasynyń ókili.
Eske sala keteıik, buǵan deıin ShQO-da esirtki saqtaǵany úshin 10 jylǵa sottalǵan eki adamdy apellıatsııalyq sot aqtap alǵanyn jazǵan edik.
