Elordada jetimder úıiniń 49 túlegi baspanaly boldy
ASTANA. QazAqparat - Bıylǵy jyldyń basynan beri Astanada jetimder úıiniń 49 túlegi baspanaǵa ıe boldy. Jalpy qalada 2600 astam jetim bala baspana kezeginde tur, dep habarlaıdy elorda ákimdiginiń medıa ortalyǵy.
Qalalyq bilim basqarmasynyń jetekshisi Anýar Janǵozınnyń aıtýynsha, jetim balalar baspanaǵa birinshi kezekte ıe bolatyn sanatqa jatady.
«Buǵan qosa bilim alýy kezinde jetimder úıiniń túlekterin turǵylyqty jermen, tegin tamaq pen medıtsınalyq qyzmetpen qamtamasyz etý máselesi de qarastyrylǵan. Osy oraıda bizde Otbasyny qoldaý ortalyǵynyń jumysynyń arqasynda qalyptasyp otyrǵan oń dınamıkany atap ótkim keledi. 2016 jyldan beri balalar úıinde bala asyrap nemese patronattyq qamqorlyqqa alýǵa nıetti otbasylarǵa quqyqtyq keńes berip keledi. Osy kúnge deıin 200-ge jýyq otbasyǵa atalǵan baǵyttaǵy konsýltatsııa kórsetildi», - dedi qalalyq máslıhattyń áleýmettik-mádenı máseleleri jónindegi turaqty komıssııasynda baıandama jasaǵan bilim basqarmasynyń jetekishisi A.Janǵozın.
Qalalyq turǵyn úı basqarmasynyń jetekshisi Rýslan Ahmetovtiń málimetinshe, baspana kezek tártibi boıynsha beriledi.
«2015 jyly qoldanystaǵy zańǵa ózgeris engizilgende Astanada shamamen 1500 jetim úı kezeginde turǵan bolatyn. Zań júzinde jetim balalarǵa basymdyq berilip, baspanaǵa birinshi kezekte ıe bolý quqyǵyna ıe boldy. Osy oraıda júrgizgen taldaý nátıjesi elimizdiń ishki mıgratsııasynyń saldarynan eki-úsh jyldyń ishinde kezek myń adamǵa ulǵaıdy. Jalpy, sońǵy bes jyldyń ishinde jetim balalarǵa 400-ge jýyq páter berildi», - dedi turǵyn úı basqarmasynyń jetekshisi R.Ahmetov.
Tek 2017 jyldyń basynan beri 49 jetim úıli bolǵan.
«Al 2015 jyly 165 jetim baspanaǵa qol jetkizdi. Bul jumys jalǵasyp jatyr. Al áli kúnge deıin turǵyn úımen qamtamasyz etilgen jetim balalarǵa keler bolsaq, 2013 jyly zańǵa sáıkes balalar úıine túsken kúnnen bastap alty aı ishinde balany baspana kezegine ýaqyty qoımaǵany úshin qamqorshy men balalar úıiniń dırektoryna qatysty ákimshilik shara qoldaný týraly ózgeris engizildi», - dedi R.Ahmetov.
