Elordada «Jeruıyq» kórkemfılminiń tusaýkeseri ótedi
ASTANA. 30 mamyr. QazAqparat - Búgin Qazaqstan halqy Assambleıasy, Astana qalasynyń ákimdigi, Sh.Aımanov atyndaǵy «Qazaqfılm» AQ-y elordadaǵy «Qazaqstan» ortalyq kınokontsert zalynda belgili rejısser Slambek Táýekeldiń qýǵyn-súrgin jyldary Qazaqstanǵa jer aýdarylǵandar týraly «Jeruıyq» kórkemfılminiń tusaýkeserin ótkizedi.
Bul týraly Assambleıanyń baspasóz qyzmetinen habarlady.
Shara barysynda jınalǵandar aldynda Qazaqstan halqy Assambleıasy Tóraǵasynyń orynbasary - Hatshylyq meńgerýshisi Eraly Toǵjanov, Astana qalasy ákiminiń orynbasary Aıda Balaeva, Sh.Aımanov atyndaǵy «Qazaqfılm» AQ prezıdenti Ermek Amanshaev sóz sóıleıdi. QR Prezıdentiniń Saıası qýǵyn-súrgin qurbandaryn eske alý jónindegi sharalarǵa qatysýshylarǵa arnalǵan úndeýi oqylady.
Fılmniń tusaýkeser rásimine QHA músheleri, Parlament depýtattary, memlekettik organdar, shyǵarmashylyq ıntellıgentsııa ókilderi, Astana qalasynyń turǵyndary qatysady.
«Jeruıyq» kórkemfılmi 1937 jyly Qıyr Shyǵystan kárister jer aýdarylǵan Almaty oblysynyń Úshtóbe aýlynda ósken stsenarııshi Son Lavrentııdiń balalyq shaǵy týraly esteligi negizinde túsirilgen. Drama saıası qýǵyn-súrginniń shyrqaý shegi bolǵan 1937-45 jyldardy qamtıdy. «Svetlyı pýt» kolhozyna jer aýdarylǵan káris, nemis, túrik, kúrd, sheshenderdi alyp keledi, qazaq halqy olardy jatsynbaı kıimin, tamaǵy men baspanasyn bólisedi. Sol kezde aýylda keńes úkimetiniń «jaýlaryn» jappaı tutqyndaý oryn alady. Fılmniń sıýjeti qasiretti jyldardyń aýyr jaǵdaıynda izgilik pen adamgershiliktiń negizinde Qazaqstan halqy dostyǵynyń qalyptasqandyǵyn sýretteıdi.
