Elordada jergilikti ózin-ózi basqarýdy damytý máselelerine arnalǵan halyqaralyq konferentsııa ótýde

Sharaǵa «Aımaq» Qazaqstanda óńirlik damýǵa jáne jergilikti ózin-ózi basqarýǵa járdemdesý qory men EQYU-nyń Astanadaǵy ortalyǵy qoldaý jasap otyr, dep habarlaıdy QazAqparat.

Toqtala ketetin jaıt, 2009 jylǵy aqpannyń 9-ynda Memleket basshysy «QR keıbir zańnamalyq aktilerine jergilikti memlekettik basqarý jáne ózin-ózi basqarý máseleleri boıynsha ózgerister men tolyqtyrýlar engizý týraly» zańyna qol qoıǵan bolatyn.

«Zańnyń qoldanysqa engizilgenine bir jyldan astam ýaqyt bolǵandyqtan biz qujattyń oryndalý tetikterin, ondaǵy problemalardy talqylaıtyn alań retinde búgingi jıyndy uıymdastyrdyq. Taǵy bir aıta keterligi, «Nur Otan» HDP tarapynan da, basqa da qoǵam ınstıtýttary tarapynan da jergilikti ózin-ózi basqarýǵa qatysty zań jobalary ázirlengen bolatyn. Degenmen, Parlamentke Úkimet ázirlegen nusqa usynylyp, zańnyń jan-jaqty talqylanǵanyna qaramastan ondaǵy basym jańalyqtar úkimettik nusqa boıynsha qabyldandy», dedi jıyndy ashyp sóz sóılegen Májilis depýtaty Aıgúl Soloveva.

Jıyn barysynda Qazaqstandaǵy jergilikti ózin-ózi basqarý ınstıtýtynyń qalyptasýy, óńirlerdiń damýyndaǵy máslıhattardyń róli, aýmaqtyq qoǵamdyq ózin-ózi basqarý qyzmetiniń oń tájirıbesin baǵalaý máseleleri qarastyrylady. Jalpy, jergilikti ózin-ózi basqarý júıesin engizý, ıaǵnı aýmaqtardy damytýǵa qatysty sheshimderdi qabyldaýǵa jurtshylyqtyń qatysýy azamattardyń ál-aýqatyn jaqsartý boıynsha jumystyń tıimdiligin arttyrýǵa oń yqpal etedi.

Konferentsııa qatysýshylar talqylaý barysynda barlyq múddeli taraptarǵa jergilikti ózin-ózi basqarý organdary men óńirlerdiń tıimdi damýy úshin negiz bolatyn usynymdar ázirleýdi josparlap otyr.

Sharaǵa ortalyq atqarýshy organ ókilderi, QR Parlamentiniń jáne barlyq deńgeıdegi máslıhattyń depýtattary men halyqaralyq sarapshylar qatysýda.