Elordada «Jer - bizdiń ortaq úıimiz» atty balalar arasyndaǵy XІІ ulttyq ekologııalyq kórme-konkýrsynyń jabylý rásimi ótti

Onda bir apta boıy «Býrabaı» ulttyq saıabaǵynda bolyp, óz týyndylaryn salǵan elimizdiń barlyq óńirleriniń jas qylqalam sheberleri shyǵarmashylyqtaryn tanystyrdy. Sonymen qatar jobaǵa qatysýshylar arasynda úzdikter marapattaldy. Atap aıtqanda, baıqaýdyń bas júldesi atyraýlyq Aıdana Tólegenovaǵa buıyrdy. Al júldeli úsh oryn Petropavl men Qaraǵandydan kelgen jas sýretshilerdiń qanjyǵalaryn maılady.

Baıqaý tóreshileri balalardyń úıden salyp kelgen óner týyndylaryn da baǵalap, óner jaıyndaǵy kitaptardy syıǵa tartty. Máselen, «Tabıǵatqa syıǵa tartylǵan bir kún» atalymynda «Qus uıasy» atty týyndynyń avtory Rýstam Zalııaev, «Tabıǵatpen birge» atalymynda «Álem - búrkit kózimen» atty eńbektiń avtory Araılym Maqsotova, «Ańyzdaǵy meniń ólkem» atalymynda «Uıqy» atty týyndynyń avtory Naılıa Júrsinova marapattaldy.

Esterińizge sala keteıik, «Jer - bizdiń ortaq úıimiz» atty balalar arasyndaǵy XІІ ulttyq ekologııalyq kórme-konkýrsy aǵymdaǵy jyldyń 22-28 maýsym kúnderi aralyǵynda «Býrabaı» ulttyq saıabaǵynda ótken edi.