Elordada Jeńistiń 65 jyldyq mereıtoıyna arnalǵan «Eske alý kezdesýi» atty dóńgelek ústel ótti
Soǵys jyldarynda qaza tapqan azamattardy bir mınýt únsiz eske alýmen bastalǵan shara barysynda «Nur Otan» HDP «Jas otan» jastar qanatynyń Pavlodar oblystyq fılıaly ókilderiniń arnaıy Máskeýge baryp, «Belgisiz soldat» qabiriniń basyndaǵy máńgilik alaýdan ákelgen oty qoıyldy.
Alqaly jıynǵa qatysqan soǵys ardagerleriniń biri Qadan Bekenov «Bizdiń Prezıdentimiz N.Nazarbaev Uly Otan soǵysynyń ardagerlerine kóp kómek kórsetýde. Qazirgi ýaqytta bizderge kommýnaldyq qyzmetter tegin kórsetilip, júrip-turýymyz aqysyz bolyp otyr. Tipti Qazaqstan aýmaǵynda avtobýstarmen tegin qatynaımyz. Jeńistiń 65 jyldyq mereıtoıyna oraı jyl aıaǵyna deıin TMD-aýmaǵynda poıyzben aqysyz júre alamyz», dese, soǵys barysynda basynan keshken oqıǵalarymen bólisken ardager Petr Komıssarov «Qazirgi ýaqytta kórshi elderdegi saıası turaqsyzdyqty kúnde kórip júrmiz. Al san túrli ult ókilderi turatyn elimizdi beıbitshilik ornaǵan. Men sony maqtan tutamyn», dep aǵynan jaryldy.
Dóńgelek ústel barysynda Sverdlov oblysynda ótkizilip jatqan «Jeńistiń juldyzdy kópiri» medıa forýmyna qatysýshylarmen, Máskeý, Ekaterınbýrg, Reseıdiń Shyǵys, Batys, Ońtústik, Soltústik okýrgterimen beınekópir arqyly baılanysyp, ardagerler surapyl soǵys jyldarynda bastan keshken oqıǵalarymen bólisti.
Atalǵan sharany «Eýrazııa ǵylymdary ekonomıkalyq klýby» qaýymdastyǵy, Ekonomıkalyq zertteý ınstıtýty, «Nur Otan» HDP «Jas otan» jastar qanaty uıymdastyrdy.
