Elordada Jeńistiń 65 jyldyǵyna arnalǵan «Jeńimpaz sarbazdarǵa arnalady...» atty kórmeniń ashylý saltanaty ótti
dep habarlaıdy QazAqparat.
Ardagerlerdiń erligi men erjúrektiligin eske túsirý nıetimen ótkizilgen bul kórmege 1941-1945 jyldardaǵy muraǵattyq derekter, keńes soldattarynyń kıim-keshekteri men qarý-jaraqtary, soǵys taqyrybyndaǵy kitaptar qoıylǵan. Sondaı-aq L.Gýmılev atyndaǵy Eýrazııa ulttyq ýnıversıtetiniń stýdentteri men oqytýshylarynyń eń úzdik soǵys taqyrybyndaǵy 65 jumysy qoıylǵan arnaıy kórme de ashylyp, onda qoıylǵan barlyq sýretter gospıtalge syıǵa tartyldy.
Mekeme qyzmetkerleri uıymdastyrǵan merekelik kontsertke ulasqan mádenı shara sońynda kórmege qatysqan týyndylardyń avtorlaryn arnaıy syılyqtarmen, dıplommen marapattaý rásim ótti.
Mádenı sharaǵa soǵys ardagerleri, ǵalymdar jáne Ýkraınanyń Qazaqstandaǵy Tótenshe jáne Ókiletti Elshisi Nıkolaı Selıvon, «Nur Otan» HDP Saryarqa aýdandyq fılıaly tóraǵasynyń orynbasary Vladıslav Sergeev qatysty.
Kórmeniń ashylý rásiminde sóz sóılegen "Nur Otan" HDP ortalyq apparaty basshysynyń orynbasary Qumar Aqsaqalov ardagerlerdi kele jatqan Jeńistiń 65 jyldyq mereıtoıymen quttyqtady. Mádenı is-shara "Nur Otan" HDP Astana qalalyq fılıalynyń uıymdastyrýymen ótti.
Búgingi kúni elimizdegi eń úzdik segiz medıtsınalyq ortalyqtyń ekeýi elordamyzda ornalasqan. Sonyń biri - UOS-nyń múgedekterine arnalǵan ortalyq klınıkalyq gospıtal. Jyl saıyn mekemeden júzdegen soǵys ardagerleri men múgedekteri sonymen qatar aýǵan soǵysynan, Chernobyl apatynan jáne Semeı ıadrolyq polıgonynan zardap shekken adamdar em qabyldaıdy.
