Elordada jeńildigi bar kólik kartalaryn qaıta shyǵarý baǵasy qymbattaıdy
NUR-SULTAN. QazAqparat - Elordada 2021 jylǵy 1 naýryzdan bastap jeńildigi bar jáne oqýshylarǵa arnalǵan «TRANSCARD» kólik kartalaryn qaıta shyǵarý baǵasy 1000 teńge bolady, dep habarlaıdy QazAqparat.
Qala ákimdiginen málim etkendeı, bul rette, jeńildigi bar karatalardy alǵash ret alatyndar úshin baǵa – 500 teńge kóleminde qalady.
«Bul shara valıýta baǵamy men jetkizýshilerden satyp alý baǵasynyń kóterilýine, kólik kartalaryn jasaýǵa arnalǵan operatsııalyq jáne kúrdeli shyǵyndardyń ósýine baılanysty qabyldandy. Atap aıtqanda, ornatylǵan NXP chıpi bar Mifare Plus EV1 standartyndaǵy baılanyssyz mıkroprotsessorlyq smart-kartalardyń baǵasy artty. Sondaı-aq, apparattyq-baǵdarlamalyq keshenge qyzmet kórsetýdiń quny joǵarylady.
Sondyqtan, qazirgi ýaqytta barlyq shyǵyndardyń ósýin jáne paıdany eseptemegende, kólik kartasyn shyǵarý shamamen 1000 teńgeni quraıdy», - dedi ákimdikten.
Jalpy 2021 jyldyń basynan astanada jeńildigi bar jáne mektep oqýshylaryna arnalǵan 8 416 kólik kartasy satyp alyndy. Ótken jyly bul kórsetkish 59 732 qurady. Al 2019 jyly 88 108 karta satyp alynǵan bolatyn.
Sondaı-aq, jol aqysyn tóleýdiń elektrondyq júıesiniń málimeti boıynsha, osy aıda jolaýshylar legi kúnine 489 myńdy qurady. Olardyń ishinde orta eseppen kúnine 40 myń oqýshy valıdatsııa jasaıdy. Al jeńildigi bar kólik kartalary boıynsha valıdatsııalar – 85 myń.
