Elordada jeńil kólik jasóspirim balany qaǵyp ketti
NUR-SULTAN. QazAqparat – 27 jastaǵy «Chevrolet Nexia» avtokóliginiń júrgizýshisi Asan Qaıǵy kóshesiniń qıylysynda kámeletke tolmaǵan 2012 jylǵy jaıaý júrginshini qaǵyp ketti, dep habarlaıdy QazAqparat qalalyq Pd baspasóz qyzmetine silteme jasap.
«Oqıǵa 18 mamyr kúni saǵat 21:57-de oryn alǵan. Júrgizýshi Tarhan kóshesiniń boıymen Brýsılovskıı kóshesi jaǵynan kele jatqan, al jaıaý júrginshi belgilengen jerde joldyń soldan ońǵa qaraı burylatyn tusynan júgirip ótpek bolǵan. Jol-kólik oqıǵasy saldarynan kámeletke tolmaǵan jaıaý júrginshi aýrýhanaǵa jetkizilip, dárigerlerdiń qaraýynan keıin úıine jiberildi» delingen habarlamada. Atalǵan fakti boıynsha tergeý amaldary júrgizilýde. Bul oqıǵany zhaloby.astana paraqshasynda kýágerler de bólisken edi. Polıtsııa departamenti Nur-Sultan júrgizýshilerinen qozǵalys kezinde barynsha muqııat bolýdy, jyldamdyq rejımin, qaýipsiz qashyqtyqty jáne manevr jasaý erejelerin múltiksiz saqtaýdy suraıdy.
