Elordada jeltoqsan aıynda qandaı mádenı sharalar ótedi
ASTANA. QazAqparat - Astana qalasynyń mádenıet jáne sport basqarmasy jeltoqsanda elordada ótetin merekelik sharalardy jarııalady, dep habarlaıdy QazAqparat tilshisi.
«Búginde QR Tuńǵysh Prezıdenti men elordany Astanaǵa aýystyrý kúnine oraı ótetin sharalarǵa qyzý daıyndyq jumystary júrip jatyr. Jeltoqsanda bolatyn aıtýly merekeler mádenı-buqaralyq sharalar, qoıylymdar men kontsertter jáne otshashýlarǵa jalǵasady», - dedi Astana qalasy mádenıet jáne sport basqarmasy basshysynyń orynbasary Narıma Muhambetalına baspasóz máslıhatynda.
1 jeltoqsanda Energııa holl kontsert zalynda qazaqstandyq estrada juldyzdarynyń qatysýymen QR Tuńǵysh Prezıdenti kúninen arnalǵan «Jańa dáýir - jarqyn bolashaq» atty merekelik kontsert ótedi.
10 jeltoqsanda elordany Astanaǵa aýystyrý kúni oraı, óner juldyzdary «Astana» kontsert zalynda «Astana armany» kontsertimen qala turǵyndary men qonaqtaryna óz ónerlerin kórsetedi.
15 jeltoqsan kúni Astanada resmı túrde «Alǵashqy qar» sharasymen shańǵy tebý maýsymy resmı túrde ashylady. Bul kúni Prezıdent saıabaǵy, Botanıkalyq baq jáne Trıatlon baǵynda shańǵy trassalary ashylady.
16 jeltoqsan táýelsizdik kúnine oraı, qala ákimdiginiń alańynda elordanyń jetekshi shyǵarmashylyq ujymdarynyń uıymdastyrýymen merekelik is-shara ótedi.
Jańa jyldyq daıyndyq sharalaryna kelsek, qala boıynsha 3 jerde muz qalashyqtary ornalasady, ıaǵnı «Hanshatyr» SOSO, Botanıkalyq baq pen qalalyq ákimdik alańynda.
Odan bólek, Astananyń 11 jerinde syrǵanaq alańdary ashylady (Hanshatyr, Botanıkalyq baq, Jeruıyq, Jetisý,Kemal Atatúrik atyndaǵy saıabaqtarynda, Qabanbaı batyr dańǵyly, Táshenov kóshesi, EKSPO, Alataý SK, Beıbitshilik jáne kelisim saraıy jáne Esil ózeniniń jaǵalaýynda).
Sonymen qatar, merekelik sharalarmen elorda mańyndaǵy eldimekenderdiń de qamtylatyny aıtyldy.
