Elordada jeke turǵyn úılerdiń órt qaýipsizdigi tekserilýde
NUR-SULTAN. QazAqparat - Elimizde jylý berý maýsymy jaqyndap keledi. Osy oraıda elordada ot jaǵý maýsymy kezinde órt qaýipsizdigin qamtamasyz etýdiń daıyndyq barysy týraly QazAqparat tilshisi Nur-Sultan qalasy Tótenshe jaǵdaılar departamentiniń basshysy Baýyrjan Syzdyqovtan surap bilgen bolatyn.
«Jylý berý, ot jaǵý maýsymy taıap keledi. Bul jerdegi bizdiń basty mindet órt qaýipsizdigin qamtamasyz etý. Osy oraıda qalalyq tótenshe jaǵdaılar qyzmeti óz mindetin atqarýǵa kirisip te ketti. Qalada 15 tamyz ben 15 qyrkúıek aıy aralyǵynda jeke turǵyn úılerdi aralap, aldyn ala túsindirý jumystary júrip jatyr. Shara bastalǵaly 5 myńnan astam zańbuzýshylyq anyqtalyp, tirkeldi. Bul birinshi kezeń, órt jaǵdaıynyń aldyn alý sharasynyń ekinshi kezeńi jylý berý maýsymy bastalǵan sátten onyń sońyna deıin jalǵasady»- dedi B. Syzdyqov.
TJD basshysynyń sózine sensek, órt jaǵdaıy kóbinese jeke turǵyn úı sektorlarynda oryn alady.
«Turǵyndar arasynda órt qaýipsizdigine qatysty túsindirý jumystaryn ótkizýdiń mańyzy zor. Sebebi ótken jyly bizdiń mamandar osyndaı shara barysynda 18 myńnan astam zańbuzýshylyqty anyqtady. Anyqtalǵan zańbuzýshylyqtyń 70% halyqqa túsindirý jáne kómektesý jumystary arqyly ýaqytyly joıyldy. Odan bólek, áleýmettik az qamtylǵan 1200-den astam adamnyń úıine ýly gaz datchıgi ornatyldy. Dál osy datchıkterdiń arqasynda 2 birdeı otbasy órt qaýpinen aman qaldy. Bıyl da bul baǵyttaǵy jumystar jalǵasyn tabady. Ol úshin búginde árbir aýdandyq ákimdiktermen tıisti sharalardy qolǵa alyp jatyrmyz», - dedi ol.
Sondaı-aq, departament basshysy jeke turǵyn úılerden órt qaýipsizdigin buzǵan zańbuzýshylyq anyqtalǵan jaǵdaıda, onyń ıelerine aıyppul salynbaıtynyn, ıaǵnı túsindirý jumysymen ǵana shekteletinin tilge tıek etti.
Aıta ketsek, buǵan deıin Baýyrjan Syzdyqov elordada sýǵa túsýge arnalǵan oryndardyń kóbeıetini týraly málim etken bolatyn.
