Elordada jeke taksı júrgizýshisinde koronavırýs anyqtaldy

Nur-Sultan qalasynyń ákimdigi jolaýshylardyń qaýipsizdigin qamtamasyz etý maqsatynda elorda turǵyndaryna asa qajettilik týyndaǵan jaǵdaıda ǵana tek resmı tasymaldaýshylardyń qyzmetin paıdalanýǵa keńes beredi. Karantın rejımi bastalǵannan beri qalalyq shtab resmı taksıge kólikterin kúnde dezınfektsııadan ótkizýge talap qoıdy. Sanıtarlyq normalar saqtalmaǵan jaǵdaıda tasymaldaýshylarǵa aıyppul salynady.

Sonymen qatar, koronavırýs taǵy bir turǵynda rastaldy. 50-den astam baılanysta bolǵan tulǵalar anyqtaldy, olardyń barlyǵy dárigerlerdiń baqylaýynda. Nur-Sultan qalasy boıynsha koronavırýs dertine shaldyqqandardyń sany 223 adamǵa jetti.

9 sáýirdegi derekterge sáıkes 202 adam ınfektsııalyq statsıonarda (10 adam Aqmola oblysynan), 930 jaqyn baılanysta bolǵan adam úı karantıninde. Nur-Sultan qalasynda 30 adam koronavırýstan emdelip shyqty. Qalada barlyǵy 13 nysan karantınge jabyldy. Olardyń qatarynda medıtsınalyq nysandar, jataqhana, №1 avtobýs parki, turǵyn úı keshenderiniń kireberisteri bar. 8 nysan karantınnen alyndy.

Infektsııanyń taralýyn boldyrmaý maqsatynda kún saıyn áleýmettik nysandarǵa, turǵyn úılerge, aýla aýmaqtaryna, trotýarlarǵa, bazarlarǵa, dúkenderge jáne t. b. dezınfektsııa júrgiziledi. Sonymen qatar, Komsomolskıı, Ilınka, Promyshlennyı, Zarechnyı, Internatsıonalnyı, Jeleznodorojnıkov, Óndiris, Ońtústik-Shyǵys turǵyn úı alaptary dezınfektsııalanyp jatyr.