Elordada jedel járdemge koronavırýs kúdigimen 2,6 myńnan astam turǵyn qońyraý shalǵan
NUR-SULTAN. QazAqparat - Maýsymda elordalyqtar koronavırýs juqtyryp aldym dep qaýiptenip, jedel medıtsıalyq járdem stansasyna 2,6 myńnan astam qońyraý shalǵan. Bul týraly Nur-Sultan qalasy Jedel medıtsınalyq járdem stansasynyń dırektory Murat Orazbaev aıtty, dep habarlaıdy QazAqparat tilshisi.
«Elimizdiń bas memlekettik sanıtarlyq dárigeriniń qaýlysyna sáıkes, jedel kómek qyzmetkerleri aıyna bir ret 100 paıyz PTR-testileýinen ótýi tıis. Osy rette Nur-Sultan qalasy boıynsha mynadaı derek keltire keteıin. 1 maýsymnan bastap búgingi kúnge deıin koronavırýs ınfektsııasymen baılanysty 2,6 myńnan astam shaqyrtý tirkeldi. Onyń ishinde 1 236 patsıent aýrýhanaǵa jatqyzyldy. Bul 48 paıyzdy quraıdy. Qalǵan patsıentter ýchaskelik dáriger qadaǵalaý úshin úılerine jiberildi», - dedi Murat Orazbaev Ortalyq kommýnıkatsııalar qyzmetinde ótken brıfıng barysynda.
Al Ulttyq shuǵyl medıtsınany úılestirý ortalyǵy basqarma tóraǵasynyń mindetin atqarýshy Baýyrjan Júsipov jedel medıtsınalyq járdem qyzmetine koronavırýs ınfektsııasyna baılanysty túsken qońyraýlardyń 5 myńnan asyp ketkendigin aıtady.
«Biz únemi monıtorıng júrgizip otyramyz. Mádimetter kún saıyn, tipti saǵat saıyn ózgerip turady. Qazirgi ýaqytta koronavırýs ınfektsııasy kúdigimen 5 myńnan astam shaqyrtýlarǵa jedel kómek brıgadasynyń qyzmet kórsetkendigi týraly málimet bar. Olardyń 70 paıyzǵa jýyǵy aýrýhanaǵa jatqyzylǵan. Bizde bekitilgen algorıtm bar. Soǵan sáıkes, aýrýdyń jeńil aǵymy anyqtalǵan jaǵdaıda jáne qaýip faktorlary joq patsıent úıde qaldyrylady. Ary qaraı emhananyń ýchaskelik dárigeriniń qadaǵalaýyna jiberiledi. Keıbir jaǵdaıda patsent aýrýhanaǵa aparylǵan joq, endi bir jaǵdaılarda koronavırýs ınfektsııasy belgileri baıqalmady», - dedi Baýyrjan Júsipov.
