Elordada jedel járdem qyzmeti erekshe qarqynmen jumys istep jatyr - Sáýle Qısyqova
NUR-SULTAN. QazAqparat – Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova jedel járdem qyzmetine qatysty málimetterdi aıtty, dep habarlaıdy QazAqparat tilshisi.
«Elordada jedel járdem qyzmetine júkteme artty. Aptasyna turǵyndardan 28 myń ótinish kelip túsken. Sońǵy táýlikte bul kórsetkish 4,5 myńǵa deıin jetti. Qyzmet kórsetilgen shyqyrýlardyń sany 18 myńǵa jýyqtap, keshe 2,8 myń boldy. Sonyń ishinde aptasyna koronavırýs indetine baılanysty 4 438 qońyraý shalyndy. Keshe 1300 shaqyrtý boldy», - dedi S. Qısyqova Ortalyq kommýnıkatsııalar qyzmetinde.
Onyń sózine qaraǵanda, jedel járdem bazasynda aýmaqtyq emhanalardyń orta medıtsınalyq qyzmetkerleriniń baılanys ortalyǵy uıymdastyryldy. Onda kún saıyn orta eseppen 500-ge deıin qońyraý shalynady. Negizinen suraqtar koronavırýs ınfektsııasyna qatysty.
«Sonymen qatar, alǵashqy medıtsınalyq sanıtarlyq kómek uıymdarynda, aýmaqtyq emhanalarda qosymsha jáne jańa jedel járdem toptaryn qurý týraly sheshim qabyldandy. Jalpy, jedel járdem telefon qońyraýlaryna qyzmet kórsetý úshin kún saıyn shamamen 150-ge jýyq jedel járdem brıgadasy jumys istep jatyr», - dedi S. Qısyqova.
