Elordada jedel járdem brıgadalary jarysqa túsip jatyr
ASTANA. QazAqparat -Búgin Astanada Jedel járdem brıgadalarynyń ІІІ respýblıkalyq jarysy ótedi, dep habarlaıdy QazAqparat tilshisi.
Qazaqstandaǵy jedel járdem qyzmetkerleriniń biliktiligin arttyrýǵa baǵyttalǵan bul shara 2016 jyldan beri uıymdastyrylyp keledi.
«Munda jeńiske jetý maqsat emes, tájirıbe jınap, jetilý mańyzdy. Munyń barlyǵy jedel járdem qyzmetin jańǵyrtý aıasynda júrgizilip jatyr. Úsh jyl ishinde bolǵan oń ózgerister baıqalyp jatyr. Olardyń mártebesin de kóterý qajet, sebebi jedel járdem - óte jaýapty jumys», - úshinshi respýblıkalyq jarystyń moderatory Madına Ábdirahmanova.
Saıysta shuǵyl, aýyr jaǵdaıdaǵy naýqastarǵa kómek kórsetý boıynsha tapsyrmalar beriledi. Ár stantsııa pedıatrııa, bosaný, jaraqat, júrek-ókpe reanımatsııasy syndy eń ózekti baǵyttarǵa arnalǵan. Tapsyrmany oryndaýǵa 15 mınýt beriledi. Upaılar balldyq júıe boıynsha esepteledi jáne úsh baqylaýshy baǵa beredi. Munda toptyń jyldamdyǵy, ujymmen jumys isteýi, medıtsınalyq kómekti kórsetýdegi durys algorıtmi eskeriledi. 
Respýblıkalyq jarysqa 18 komanda qatysýda, onyń biri arnaıy shaqyrtýmen kelgen lıtvalyq komanda bolsa, taǵy biri - jeke Intertıch kompanııasy.
«Biz naýqasqa 8 mınýtta jetýimiz kerek jáne kóp jaǵdaıda bul normany oryndaımyz. Bizge kólikter ǵana kedergi keltirýi múmkin. Biraq, Qazaqstanmen salystyrǵanda, bizdiń elimizde júrgizýshiler jedel járdem kóligine jol beredi. Keıbir qazaqstandyq kólik ıeleri jedel járdemge jol bermeıdi eken, bul qyzyq», - deıdi lıtvalyq qatysýshy Rıtıs Malashaýskas.
«Oqıǵa» ornynda manekender men shartty naýqastar paıdalanyldy. Medıtsınalyq kolledj stýdentteri shartty naýqastar rólin atqarýda.
