Elordada jaıaý júrginshini qaǵyp mert etken kóliktiń júrgizýshisi ustaldy
ASTANA. Shildeniń 12-si. QazAqparat - Elordada jaıaý júrginshini qaǵyp óltirip, jol-kólik oqıǵasy ornynan qashyp ketken sheteldik kóliktiń júrgizýshisi ustaldy,
dep habarlady Astana qalalyq jol polıtsııasy basqarmasynyń baspasóz qyzmetinen.
Shildeniń 8-i kúni tún ortasynda, Ýálıhanov kóshesi boıymen kele jatqan «Mıtsýbısı Galant» kóliginiń júrgizýshisi joldy kesip ótpek bolǵan azamatty qaǵyp ketken. Jol-kólik apatynan keıin júrgizýshi oqıǵa ornynan boı tasalaǵan. Zardap shekken azamat sol mezette túrli dene jaraqattarymen aýrýhanaǵa jetkizilgen. Alaıda ol aýyr jaraqattardyń saldarynan es jınaı almaı, shildeniń 9-y kúni qaza tapqan.
«Jedel izdestirý is-sharalaryn júrgizý barysynda «Mıtsýbısı Galant» kóliginiń júrgizýshisi ustaldy. Ol óz kinásin moıyndap otyr», delingen baspasóz habarlamasynda.
