Elordada jataqhananyń 5-qabatynda emhana ashyldy
NUR-SULTAN. QazAqparat - Sáken Seıfýllın atyndaǵy Qazaq agrotehnıkalyq ýnıversıtetinde stýdenttik emhana ashyldy, dep habarlaıdy QazAqparat tilshisi.
Emhana kabınetteri 2A jataqhanasynyń besinshi qabatynda ornalasqan. Kireberiste arnaıy monıtor bar. Sol jerde «Smart Astana» qosymshasy arqyly dárigerdiń qabyldaýyna jazylýǵa bolady. Budan bólek, «DamýMed» qosymshasyn paıdalanýǵa bolady.
Stýdenttik emhanada protsedýrlyq kabınet, elektrokardıogramma, ýltradybysty zertteý, sondaı-aq, qan analızderin qabyldaý kabınetteri bar. Ol jerde tórt dáriger-terapevt, kardıolog, nevropatolog, psıholog jáne birneshe medbıke otyrady. Al birinshi qabatta fızıokabınet ashylǵan.
«Bul - jataqhana ǵımaraty. Jaqynda biz jańa jataqhanany ashtyq. Sol sebepti osy jerde emhanany ashýdy uıǵardyq. Bizde 13,5 myń stýdent, magıstrant pen doktorant bar. Olardyń barlyǵy qala emhanalaryna baryp, kezekpen qyzmet alatyn. Árıne, olaı júrgen yńǵaısyz. Sebebi kezekke turady. Oǵan oqýdyń ýaqytyn jumsaıdy. Sosyn aýrý juǵady. Ol da bar. Sondyqtan bir arnaıy óz stýdentterimizge emhana ashýǵa sheshim qabyldadyq. Oǵan onlaın rejimde jazylýǵa bolady», - deıdi ýnıversıtet rektory Aqylbek Kúrishbaev. 
Aıta keteıik, stýdenttik emhana №5 qalalyq emhanamen birlesip ashylyp otyr. Ol osy mekemeniń fılıaly retinde jumys isteıdi.
