Elordada «Jasyl el» eńbek jasaqtarynyń XVIІ eńbek maýsymy bastaldy
2017, 2018, 2019 jyldardaǵy kvotaǵa sáıkes 975 adam jumyspen qamtylǵan. Atalǵan jobanyń jastar arasyndaǵy suranysy men qyzyǵýshylyqtary eskerilip, 2020 jyldan beri aldaǵy 3 jylǵa kvota 1200 adamǵa deıin ulǵaıdy. Al jastardy arnaıy ekıpırovkamen qamtý 600 danadan 1200 danaǵa ulǵaıtyldy.
Bul jobaǵa ásirese, kópbalaly, áleýmettik az qamtylǵan otbasylardan shyqqan balalar men jumyssyz jastar tartylady. Máselen, byltyr áleýmettik az qamtylǵan otbasylardan shyqqan 731 bala jumyspen qamtyldy.
Buǵan deıin jastar syıaqysy 35 394 teńgeni qurasa, bıyl syıaqy mólsherin 10 AEK ulǵaıtý josparda bar. Bul 64 myń teńgeni quraıdy.
Jobaǵa 14-29 jas aralyǵyndaǵy jastar 3 sanat boıynsha jumys isteıdi:
1. Kópbalaly, áleýmettik az qamtylǵan otbasylardan shyqqan 14-17 jas aralyǵyndaǵy balalar;
2. 17-22 jas aralyǵyndaǵy JOO men kolledj stýdentteri;
3. 18-29 jas aralyǵyndaǵy jumyssyz azamattar.
Jumys kestesi tómendegideı:
14-17 jas aralyǵyndaǵy jastar kámelettik jasqa tolmaǵandyqtan QR Eńbek kodeksine sáıkes, densaýlyqtaryna zııan tıgizbeıtin, aýyr emes, kúnine 4 saǵattan artyq emes jumys isteıdi. Balalar elorda saıabaqtarynda, óz mektepteriniń aýlasyn kógaldandyrýǵa, mektepke qarasty aımaqtardy tazalaý jumystaryn atqarady.
17-22 jas aralyǵyndaǵy jastar «Astana ZelenStroı» kompanııasymen birlesip, qala saıabaqtarynyń kógaldanýyna úles qosýda.
Kámelet jasynan asqan jastar eńbek kestesine sáıkes kúnine 8 saǵat jumys isteıdi. Olar qurylys nysandaryna da jumyldyrylǵan. Onda mamandardyń kómekshileri sekildi túrli qyzmet etedi.
Jastar ózderi jumys isteıtin orynnan jalaqy alsa, «Jasyl el» jobasy qosymsha 35 myń teńge kóleminde syıaqy taǵaıyndaıdy. Buǵan qosa, otandyq kompanııa shyǵarǵan arnaıy ekıpırovka (beısbolka, aq fýtbolka, sport kıimi) beriledi.
Árbir jaspen kelisimshart jasalyp, onda kórsetilgendeı qaýipsizdik talaptary mindetti túrde saqtalady.
Karantınge baılanysty jumys talaptary biraz ózgerdi. Sanıtarlyq normalar men qaýipsizdik saqtaý maqsatynda jastardyń bir jerde shoǵyrlanyp jumys isteýine jol berilmeıdi. Jastardyń ara qashyqtyqty saqtaı otyryp jumys isteýi, barlyq jastardyń betperde men qolǵap kııýi qadaǵalanatyn bolady.
Qazirgi tańda jastar tórt baǵyt boıynsha jumys atqarýda: Birinshisi – qaladaǵy saıabaqtar, ekinshisi – qurylys nysandary, úshinshisi «Jasyl belbeý» alańy. Sonymen qatar, tórtinshi baǵyt, ıaǵnı kámilettik jasqa tolmaǵan 14-16 jas aralyǵyndaǵy jastar qaladaǵy bilim mekemeleriniń aýmaǵynda qosymsha jasyl jelektendirý, tazalyq jumystaryna tartylýda.
Byltyr «Jasyl el» jobasynyń aıasynda elorda boıynsha 1 200-den astam jas jumyspen qamtamasyz etildi. Onyń ishinde 960-y qala ishindegi áleýmettik nysandarda, jalpy orta bilim beretin mektepter aýmaǵynda, saıabaqtarda jumys atqarsa, qalǵan 240 jas Elbasy bastamasymen júzege asyrylǵan elorda aýmaǵyndaǵy «Jasyl beldeýdiń» kógaldandyrý, árlendirý jumystaryna jumyldyrylǵan. Olarǵa «Astana ormany» JShS tarapynan 90 myń teńge jalaqy jáne «Jasyl el» jobasy atynan jalaqylaryna qosymsha 35 myń teńge júrdi.
