Elordada jastarǵa arnalǵan jaldamaly páter qashannan bastap beriledi

NUR-SULTAN. QazAqparat – Nur-Sultan qalasy ákimdiginiń qoǵamdyq damý basqarmasynyń basshysy Talǵat Rahmanberdi elorda jastaryna jaldamaly páter qashannan bastap beriletinin jarııalady, dep habarlaıdy QazAqparat tilshisi.

«Nur-Sultan qalasynda 14-29 jas aralyǵynda 245 myńnan astam azamat bar. Osy baǵdarlamaǵa sáıkes, jyl sońyna deıin 1050 páter berý qarastyrylǵan. Dál qazirgi ýaqytta osy páterlerdiń tıisti konkýrstyq qujattary daıyndalyp jatyr. Biz jospar boıynsha qarasha aıynan bastap baǵdarlamaǵa qujat qabyldaımyz. Ol úshin eshqaıda baryp, eshqandaı kezekke turýdyń qajeti joq. Qujattardy qabyldaý «Smart-Astana» alańynda tolyǵymen elektrondy túrde ótedi. Ol týraly biz ýaqyty jaqyndaǵanda taǵy da habardar etemiz», - dedi Talǵat Rahmanberdi Ortalyq kommýnıkatsııalar qyzmetinde ótken baspasóz máslıhatynda.

Eske sala ketsek, byltyr Jastar jylynyń ashylýyna arnalǵan saltanatty jıynda Elbasy Nursultan Nazarbaev Astana, Almaty jáne Shymkent qalalarynda jastar úshin jylyna 1 myń páter salynatynyn málim etken bolatyn.
Al byltyr kúzde Úkimettiń keńeıtilgen otyrysynda sol tustaǵy Indýstrııa jáne ınfraqurylymdyq damý mınıstri Jeńis Qasymbek (qazir - Premer-mınıstrdiń orynbasary) Astana, Almaty, Shymkent jumysshy jastaryna 1 myń páter salý mamyrda bastalatynyn habarlaǵan edi.
Nur-Sultan, Almaty men Shymkent qalalarynda jastarǵa beriletin jaldamaly páter baǵdarlamasyna qalaı qatysýǵa bolatynyn búgingi baspasóz máslıhatynda QR Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Madııar Qojahmet aıtyp berdi. Jaldamaly páter alǵysy keletin jastar baǵdarlamaǵa qatysý úshin myna siltemedegi qujattardy jınaýy tıis.