Elordada jastardyń quqyqtyq mádenıetin kóterý jaıy talqylandy
«Bul is-shara QR Aqparat jáne qoǵamdyq damý mınıstrligi «Azamattyq bastamalardy qoldaý» ortalyǵynyń qoldaýymen jastardyń quqyqtyq saýattylyǵyn arttyrý maqsatynda ótkizilip otyr. «Partııalyq emes baıqaý» ortalyǵy osy jyly tirkeldi. Qazirgi ýaqytta jastardyń quqyqtyq saýattylyǵyn arttyrý baǵytynda kóptegen is-sharalardy ótkizip jatyr. Ókinishke oraı, pandemııaǵa baılanysty semınar, trenıng formatynda boldy. Búginge deıin 14 pen 29 jas aralyǵyndaǵy 10 myńǵa jýyq jas mamandardy, stýdentterdi is-sharalarymyzben qamtydyq», - dedi dóńgelek ústeldi ashqan «Partııalyq emes baıqaý» ortalyǵynyń tóraǵasy Tólegen Qunadilov.
Ortalyq tóraǵasy elimizde bıyl alǵash ret aýyl ákimderin tikeleı saılaý ótkizilgenin, Memleket basshysynyń tapsyrmasymen 2024 jyldan bastap aýdan ákimderin saılaý ilki joba retinde qolǵa alynǵanyn atap ótti. Sondyqtan jastar tek saılaýshy ǵana emes, baıqaýshy retinde de saýattylyqtaryn arttyrý kerektigine nazar aýdartty.
«Іs-sharanyń basty maqsaty – jastardyń quqyqtyq saýattylyǵyn arttyrý múmkindikterin jáne olardyń belsendi azamattyq ustanymdaryn talqylaý, quqyq buzýshylyqtarǵa tózbeýshilik qaǵıdatyn jáne jastar arasynda quqyqtyq mádenıetti qalyptastyrý, sondaı-aq óz bilimi men bolashaǵy úshin jaýapkershilikti yntalandyrýdy nasıhattaý», - dedi ol.
Dóńgelek ústel barysynda Nur-Sultan qalasy ákimdigi janyndaǵy «Astana jastary» mekemesiniń jetekshisi Shyńǵys Tileýlın baıandama jasady. Ol óz sózinde elordada jastardy áleýmettik, mádenı, turmystyq turǵyda qoldaýǵa baǵyttalǵan qandaı is-sharalar atqarylyp jatqanyna jan-jaqty toqtaldy.
