Elordada jastar TikTok-qa vıdeo túsirý úshin kópirdiń arqasyna shyǵyp ketken
NUR-SULTAN. QazAqparat – Nur-Sultan qalasynda jastar TikTok áleýmettik jelisine vıdeo túsirý úshin kópirdiń arqasyna shyǵyp ketken, dep habarlaıdy QazAqpara elordanyń Polıtsııa departamenti baspasóz qyzmetine silteme jasap.
«Oqıǵa 26 shilde kúni tańerteń 04:30-da bolǵan. Polıtsııaǵa Qabanbaı batyr dańǵylynda ornalasqan kópirdiń arqasyna bireýlerdiń órmelep bara jatqany týraly kýágerlerden habar kelip túsken. Oqıǵa ornyna polıtsııa qyzmetkerleri bardy. Atalǵan fakti rastaldy. Tártip saqshylary 19 jáne 21 jastaǵy elordanyń úsh turǵynyn ustady. Olar Nur-Sultan qalasynyń kórinisin qosa alyp TikTok áleýmettik jelisinde erekshe vıdeo túsirý úshin osyndaı áreketke barǵanyn aıtty», - dep atap ótti vedomstvonyń baspasóz qyzmeti.
«Saryarqa» aýdanynyń Polıtsııa basqarmasynyń ýchaskelik ınspektorlary tártip buzýshylarmen qoǵamdyq tártipti saqtaý boıynsha profılaktıkalyq áńgime júrgizdi. Abyroı bolǵanda jastardyń mundaı jónsiz áreketi qaıǵyly jaǵdaımen aıaqtalǵan joq.
