Jastar saıasaty jónindegi keńeste lýdomanııaǵa qarsy kúres sharalary qaraldy

ASTANA. KAZINFORM — Astana qalasynda Memlekettik keńesshi Erlan Qarınniń tóraǵalyǵymen Qazaqstan Respýblıkasy Prezıdentiniń janyndaǵy Jastar saıasaty jónindegi keńestiń kezekti otyrysy ótti. Bul týraly Aqordanyń baspasóz qyzmeti habarlady.

Jıynda nashaqorlyqqa jáne esirtki bıznesine, sondaı-aq qumar oıyndarǵa qarsy kúreske baǵyttalǵan keshendi josparlardy júzege asyrýǵa jaýapty memlekettik organdar basshylarynyń esepteri tyńdaldy.

Talqylaýlar barysynda Memlekettik keńesshi Іshki ister mınıstrligi men Týrızm jáne sport mınıstrligine keshendi josparlardy oryndaýǵa qatysty jumysty kúsheıtý jóninde tapsyrma berdi. Erlan Qarın istiń qarqyny men sapasyn joǵaltpaý kerek ekenine toqtaldy. Memlekettik keńesshi lýdomanııanyń aldyn alýǵa, sondaı-aq nashaqorlyqqa jáne esirtki bıznesine qarsy kúres júrgizýge baǵyttalǵan barlyq sharalardy sapaly júzege asyrý máselesine toqtaldy. Ol úshin bekitilgen josparlardyń oryndalý barysyna ádil ári tolyq taldaý júrgizý qajettigin atap ótti.

Keńes músheleri «Qazaqstan jastary» atty ulttyq baıandamada kórsetilgen jastar arasyndaǵy qazirgi úrdisterdi qarastyrdy.

Osy úrdisterdi eskere otyryp, jıynǵa qatysýshylar ózekti taqyryptyń biri – jastardy jumyspen qamtý máselesin talqyǵa saldy.

Erlan Qarın kezdesýdi qorytyndylaı kele, Keńes músheleri tarapynan kóterilgen kóptegen bastamanyń bıyl júzege asqanyn aıtty. Sondaı-aq, Keńestiń aldaǵy ýaqytta jańa bastamalarǵa uıytqy bolyp, jastar saıasaty salasyndaǵy mańyzdy baǵyttardy jańǵyrta túsetinine senim bildirdi.

Jalpy, otyrys nátıjesinde naqty usynystar ázirlenip, Keńeste aıtylǵan máselelerge qatysty memlekettik organdarǵa tıisti tapsyrmalar berildi.

Buǵan deıin Erlan Qarın jemqorlyqpen kúres boıynsha birqatar tapsyrma bergenin jazǵan edik.