Elordada Jastar kúni aıasynda aýqymdy aktsııa ótti (FOTO)
ASTANA. QazAqparat - Elordada Jastar kúnine arnalǵan «Special youth party» atty aýqymdy aktsııa ótti. Sharany Astana qalasy ákimdiginiń qoldaýymen «DOS» táýelsiz ómir» ortalyǵy Múgedekter qoǵamdyq birlestigi, «Nebesnyı lev» qoǵamdyq qaıyrymdylyq qory jáne «Best for Kids» qoǵamdyq qory uıymdastyrdy, dep jazady astana.gov.kz.
Astanalyq tsırk aldyndaǵy kontserttik alańda talantty jastar men múmkindigi shekteýli jandar óner kórsetti. Kontsert kezinde barlyq qatysýshylar kóńildi fleshmobqa qatysty. Bul kúni túrli baǵyttaǵy 7 alań jumys istedi: qalpaqtar saıysy, sýret saıysy, toqyma toqıtyndar arasynda jarys ótkizýge arnalǵan aýmaq, akvarelmen sýret salýshylarǵa arnalǵan jeke aýmaq, qynamen mehendı salýshylarǵa arnalǵan aýmaq. Halyqtyq qolóner sheberleriniń qolynan shyqqan buıymdardan kórme uıymdastyryldy. Budan bólek, dı-djeı Oskardyń qatysýymen bı keshi ótti.
Merekelik sharaǵa 1000-nan astam adam jınaldy. Kelýshiler «Tilek aǵashynda» izgi nıetterin bildirip, lenta baılady. Mereke sońynda barlyq qatysýshylar aspanǵa túrli tústi sharlar ushyrdy.
Aýqymdy sharanyń maqsaty - múmkindigi shekteýli jandardy elordanyń qoǵamdyq-saıası ómirine tartý, qoǵamda arnaıy qabiletteri bar adamdar týraly jaqsy pikir qalyptastyryp, olarǵa qoǵamnyń belsendi músheleri dep qaraý.
