Elordada jasóspirimder arasynda kúres túrlerinen Azııa chempıonaty bastaldy
NUR-SULTAN. QazAqparat - Búgin, ıaǵnı 4 shilde kúni elodadaǵy «Dáýlet» sport kesheninde kúres túrlerinen kadetter arasyndaǵy Azııa chempıonaty bastaldy, dep habarlaıdy QazAqparat tilshisi.
Kúrestiń úsh túrinen, atap aıtar bolsaq, grek-rım, erkin jáne áıelder kúresi boıynsha ótetin Azııa chempıonaty 7 shilde kúni máresine jetedi.
Kontınentaldyq chempıonat Biryńǵaı kúres álemi erejelerine sáıkes ótkiziledi.
14-16 jas aralyǵyndaǵy jasóspirimder arasynda ótetin dodaǵa Azııa qurlyǵynyń 19 elinen 300-den astam sportshy qatysady. Qazaqstannyń namysyn 30 sportshy qorǵamaq.
Búgin atalǵan birinshilik aıasynda «Dáýlet» SK májilis zalynda Respýblıkalyq kúres federatsııasynyń basshylyǵy baspasóz máslıhatyn ótkizdi. Onda Azııa chempıonaty jáne Tokıo-2020 Olımpıadasyna joldama beretin kúres túrlerinen álem chempıonatyna daıyndyq máseleleri sóz boldy.
Jarys kún saıyn saǵat 9:00-de bastalady. Kirý tegin.
Eske salaıyq, 2019 jylǵy 14-22 qyrkúıekte Elorda tórinde kúres áleminiń eń basty sporttyq is-sharasy - grek-rım, erkin jáne áıelder arasyndaǵy kúres túrlerinen, sondaı-aq grepplıngten álem chempıonaty ótedi.
