Elordada jasyl tehnologııa boıynsha GCIP-Kazakhstan Ulttyq akademııasynyń jumysy bastaldy
ASTANA. KAZINFORM – 28-31 shilde aralyǵynda elordada «Halyqaralyq jasyl tehnologııalar jáne ınvestıtsııalyq jobalar ortalyǵy» KEAQ uıymdastyrýymen GCIP-Kazakhstan Ulttyq akademııasy ótedi.
Akademııa — BUU-nyń Ónerkásiptik damý jónindegi agenttigi (UNIDO) men Jahandyq ekologııalyq qordyń qoldaýymen Halyqaralyq jasyl tehnologııalar jáne ınvestıtsııalyq jobalar ortalyǵy júzege asyratyn taza tehnologııalar salasyndaǵy akseleratsııalyq baǵdarlamanyń úshinshi tsıkliniń basty bilim berý is-sharasy.
Akademııanyń ashylýyna Ekologııa jáne tabıǵı resýrstar mınıstrligi, Prezıdenttik ortalyǵy ókilderiniń, sondaı-aq Qazaqstandaǵy jasyl transformatsııany ilgeriletýge úles qosyp júrgen mamandardyń qatysýymen ótti.
— Búginde taza tehnologııalar salasyndaǵy startaptardy qoldaý — bul ınnovatsııalardy ǵana qoldaý emes, Qazaqstannyń ornyqty bolashaǵyna da qatysty is. Biz Qazaqstandy jasyl tehnologııalar salasynda óńirlik jáne halyqaralyq kóshbasshy etý jáne munda búkil Ortalyq Azııa úshin quzyrettilik ortalyǵy retinde GreenTech Hub qurý degen órshil maqsatty alǵa qoıyp otyrmyz, — dedi «Halyqaralyq jasyl tehnologııalar jáne ınvestıtsııalyq jobalar ortalyǵy» KEAQ basqarma tóraǵasynyń mindetin atqarýshy Sáken Qalqamanov.
Ulttyq akademııa — ol GCIP (Global Cleantech Innovatıon Programme) — Kazakhstan baǵdarlamasynyń kelesi negizgi kezeńi jáne 2025 jylǵy konkýrstyq irikteý qorytyndysy boıynsha elimizdiń túkpir-túkpirinen 350 ótinimniń ishinen iriktelgen 51 startap-komandaǵa arnalǵan bastapqy alań. Qatysýshylar taza tehnologııa jobalaryn mynadaı basym baǵyttarda usynady:
— energııa tıimdiligi;
— jańartylatyn energııa kózderi;
— qaldyqtardy óńdeý;
— sýdy únemdep paıdalaný;
— «jasyl» qurylys;
— taza kólik;
— ozyq materıaldar men hımıkattar.
Atalǵan akademııanyń maqsatyna toqtalsaq, ekologııalyq taza tehnologııalardy engizýge basa nazar aýdara otyryp, bıznes josparlaýda, ornyqty damýda, naryqtyq strategııa men ınvestıtsııalyq tartymdylyqta negizgi quzyretterdi damytý arqyly startaptardy akseleratsııalyq baǵdarlamaǵa tabysty qatysýǵa daıyndaý. Bilim berý modýline bıznes-modelder qurý boıynsha qarqyndy trenıngter, halyqaralyq naryqqa shyǵý, ınvestorlarmen ózara is-qımyl jasaý jáne seriktesterdi tartý kiredi.
Oqytýdy turaqty tehnologııalar salasyndaǵy akseleratorlar men ınvestorlardyń bedeldi jahandyq jelisi — Network for Global Innovation (NGIN, AQSh) halyqaralyq uıymynyń sarapshylary júrgizedi.
Aıta keteıik, GCIP-Kazakhstan baǵdarlamasy — taza tehnologııalar men shaǵyn jáne orta bıznesti damytý salasyndaǵy ınnovatsııalardy ilgeriletý jónindegi jahandyq bastamanyń bir bóligi. Ulttyq akademııa — bilim berý, ornyqty ınnovatsııalardyń ekojúıesin qalyptastyrýdaǵy jáne Qazaqstanda ekologııalyq baǵdarlanǵan kásipkerlerdiń jańa býynyn qoldaýdaǵy mańyzdy qadam.
2023 jyldan bastap Halyqaralyq jasyl tehnologııalar jáne ınvestıtsııalyq jobalar ortalyǵy «Qazaqstanda ShOB sýbektilerinde taza tehnologııalar men kásipkerlikti damytýdaǵy ınnovatsııalardy ilgeriletýdiń jahandyq baǵdarlamasy» jobasyn (GCIP Kazakhstan) iske asyryp keledi.
Budan buryn habarlanǵandaı, hımııa kásiporyndarynda jasyl tehnologııany engizýdiń arnaıy jospary qabyldanady.