Elordada jasalǵan qylmystar sany tómendedi
NUR-SULTAN. QazAqparat – Búgin elordada polıtsııa departamenti keshendi kúshteri men quraldaryn garnızondyq qyzmet ornyna taratý sharasy ótti, dep habarlaıdy QazAqparat departametke silteme jasap.
Garnızondyq qyzmet ornyna taratýdy ótkizý barysynda elordalyq polıtsııa departamentiniń bastyǵy Erjan Sadenov kezekshilik táýlikte qyzmet atqarýǵa shyǵatyn jeke quramnyń qoǵamdyq tártip pen azamattardyń qaýipsizdigin kúzetýdi qamtamasyz etýge qoıylǵan mindetterdi oryndaýǵa ázirligin tekserdi.
Elordada qyzmet atqarý elordalyq polıtsııa qyzmetkerlerine erekshe jaýapkershilik júkteıdi. Qyzmet ornyna taratýǵa qatysqan Departamenttiń saptyq qyzmetteri men jedel bólinisterin teksere otyryp elordalyq polıtsııa basshysy Erjan Sadenov polıtseılerdiń kelip túsken aryzdar men ótinishterge muqııat bolýyna, sondaı-aq azamattarmen mádenıetti jáne sypaıy qarym-qatynas jasaýyna erekshe kóńil bóldi. Sonymen qatar, elordanyń turǵyndary men qonaqtary ózderin qaýipsiz sezinýi tıis ekendigin atap ótti.
Keshendi kúshter men quraldardy garnızondyq qyzmet ornyna taratý aıaqtalǵannan keıin polıtseıler qyzmet atqarýǵa kirisedi. Osylaısha, elorda polıtseıleriniń 50 paıyzǵa jýyǵyn quraıtyn polıtsııa jaıaý jasaǵy qala kóshelerin, turǵyn úı alaptaryn, park aımaqtaryn, sondaı-aq kóńil kóterý mekemeleri ornalasqan oryndardy patrýldeýge shyǵady.
Nur-Sultan qalasynyń polıtseıleri qabyldaǵan sharalardyń nátıjesinde jyldyń basynan bastap barlyq baǵyttar boıynsha qylmystardyń sany 19 %-ǵa tómendedi (qaraqshylyq - 60%, adam óltirý - 47%, tonaý - 21%, zorlaý – 8,6%, urlyq – 24,7%, buzaqylyq -51%).
Polıtsııa jaıaý jasaǵynyń tıimdi qyzmetiniń arqasynda qoǵamdyq oryndar men qala kóshelerinde qylmystar sany 24 %-ǵa, kámeletke tolmaǵandar arasynda 23 %-ǵa, alkogoldi masań kúıde jasalǵan qylmystar 22 %-ǵa tómendedi.
Sonymen qatar, qoǵamdyq tártiptiń tıisti deńgeıin qamtamasyz etý, kóshelerde, aýlalarda jáne ózge de qoǵamdyq oryndarda quqyq buzyshylyqtardyń aldyn alý maqsatynda Nur-Sultan qalasynyń aýmaǵynda «Qaýipsiz aýla», «Turmys», «Quqyqtyq tártip» jedel-aldyn alý is-sharalary ótkiziledi.
«Qaýipsiz aýla» JASh aıasynda ýchaskelik polıtsııa ınspektorlary PIK ókilderimen birlesip turǵyn úı keshenderi men kóppáterli úılerdiń aýlalarynda turǵyndardy mobıldi qabyldaýdy júrgizedi.
JASh bastalǵannan bastap aýlalarda 41 qabyldaý uıymdastyrylyp, ótkizildi, onyń barysynda 246 azamat júginip, 287 ótinish pen aryz kelip túsken.
Barlyq aryzdar men ótinishter boıynsha polıtsııa qyzmetkerleri shara qabyldap, 113 adam ákimshilik jaýaptylyqqa tartyldy, quzyretti memlekettik organdarǵa 39 aqparat joldandy.
