Elordada jas sarbazdar arasynda júgirý marafony ótti
«El Táýelsizdiginiń 30 jyldyǵyna oraı jas sarbazdar arasynda kúzgi marafon uıymdastyryp jatyrmyz. Sharanyń maqsaty – Memleket basshysynyń tapsyrmasyna sáıkesti, jastar arasynda sportty nasıhattap, olardy sportpen shuǵyldanýǵa baýlý. Marafonǵa qatysýshylar kásibı emes, áýesqoı júgirýshiler ekenin de aıta ketken jón. Olardyń elorda mektepteriniń oqýshylary men kolledj stýdentteri bar. Sonymen qatar búgingi shara bizdiń «Jas sarbaz -táýelsizdik tiregi» atty jobanyń sheńberinde ótip otyr. Budan bólek, joba aıasynda soǵys ardagerlerimen kezdesý, áskerı-patrıottyq ánder baıqaýyn uıymdastyrý, jasóspirimder arasynda kúzgi áskerı-patrıottyq jıyn ótkizý, volonterlikti damytý, kópbalaly jáne az qamtylǵan otbasylarǵa azyq-túlik sebetin taratý sekildi birqatar sharalar qarastyrylǵan», - dedi «Jas sarbaz» respýblıkalyq qoǵamdyq birlestigi fılıalynyń Nur-Sultan qalasy boıynsha tóraǵasy Ashat Nalshybek.
Júgirý marafonyna elordalyq 500-ge jýyq jas sarbaz qatysty. Onyń erejesine sáıkes jigitter 3 shaqyrymǵa al qyzdar 2 shaqyrym qashyqtyqqa júgirdi.
Sondaı-aq, uıymdastyrýshylar marafonda úzdik nátıje (1,2,3 oryn) kórsetken qatysýshylar marapattalyp, estelik syılyqtar beriletinin aıtty.
Jas sarbazdardy qoldaý úshin aıtýly sharaǵa qazaqstandyq alyp kúsh ıesi, álemniń birneshe dúrkin rekordshysy Sergeı Tsyrýlnıkov jáne Street Workout-tan elimizdiń bas jattyqtyrýshysy Aıtym Jaqypov qatysty.
«Búgingi marafonnyń ótetini týraly maǵan jattyqtyrýshym aıtty. Nege qatyspasqa degen oıǵa keldim. Marafonǵa qatysyp, birinshi bolyp keldim, júgirý qıynǵa soqty, ásirese qatty jel kedergi keltirdi. Degenmen nátıje soǵan turarlyq. Jalpy ózim sportshymyn, grek-rım kúresimen 8 jyl boıy aınalysyp kelemin», - deıdi 18 jasar marafon jeńimpazy, jas sarbaz Danııar Tólendi.
