Elordada jas polıtsııa qyzmetkerlerine arnalǵan jataqhana ashyldy
ASTANA. QazAqparat - Qazaqstan Respýblıkasy ishki ister organdarynyń 25 jyldyǵyn atap ótý qarsańynda elorda ákimdiginiń qoldaýymen Astana qalasy ІІD jas qyzmetkerlerine arnalǵan, jańa ǵımaratta ornalasqan jalpy aýmaǵy eki myńnan astam sharshy metrdi quraıtyn kazarmalyq tıptegi jataqhana ashyldy.
Jas polıtseılerge jataqhana kiltterin saltanatty túrde Astana qalasy ІІD bastyǵy, polıtsııa general-maıory Amantaı Áýbákirov tapsyrdy.
«Biz bul jerde qyzmetkerlerimizdiń jaıly turýyna barlyq jaǵdaıdy jasaýǵa tyrystyq, bir jaǵynan áleýmettik-turmystyq, turǵyn úı máselelerin sheshýge kómek bolyp, elordadaǵy qylmyspen kúres jáne qoǵamdyq tártipti qamtamasyz etýde úlgili qyzmet atqarýǵa jaqsy demeý bolady dep oılaımyn», - dedi Amantaı Áýbákirov.
Jataqhananyń keń ári jaryq bólmelerinde 100-ge jaqyn elordalyq departamenttiń jas qyzmetkerleri ornalastyrylatyn bolady. Olardyń qoldanýyna turmystyq tehnıkamen jabdyqtalǵan as bólmeler, jýynatyn jáne dem alatyn bólmeler berildi.
Astana qalasy ІІD Jergilikti polıtsııa qyzmeti jol-patrýldik polıtsııa Polkiniń polıtsııa kishi serjanty Іńkárbek Balaǵazy barlyq qyzmetkerlerdiń atynan sóz sóılep, jas qyzmetkerler úshin jataqhanada turý bolashaq otbasy úshin jeke úı alýǵa jalaqydan qarjy jınaýǵa múmkindik berip, azamattardyń qaýipsizdigi men quqyqtyq tártipti qamtamasyz etýge baǵyttalǵan qyzmettik mindetterdi atqarýda úlken kómek beretinin aıtty.
